आठवड्याच्या पहिल्या दिवशी मेट्रो-१च्या प्रवाशांचा खोळंबा
ओव्हरहेडवर ताडपत्री पडली

सकाळ वृत्तसेवा
मुंबई, ता. १६ : घाटकोपर-वर्सोवा मेट्रो मार्गावर सोमवारी (ता. १६) आठवड्याच्या पहिल्याच दिवशी मेट्रोचा खोळंबा झाला. घाटकोपरहून वर्सोव्याच्या दिशेने जाणाऱ्या मार्गिकेवर आझाद नगर मेट्रो स्थानकानजीक ओव्हरहेड वायरवर ताडपत्री पडल्याने सुमारे अर्धा-पाऊणतास मेट्रो सेवा ठप्प झाली होती. त्यामुळे या मार्गावर प्रवास करणाऱ्या प्रवाशांची मोठी गैरसोय झाली.
मुंबईत रात्रीपासून धुव्वाधार पाऊस कोसळत असतानाही मेट्रो सेवा सुरळीत सुरू आहे; मात्र आज दुपारी १२.४७ वाजता आझाद नगर स्थानक येथे नजीकच्या बांधकाम साईटवरून वाऱ्यामुळे उडून आलेली प्लास्टिकची ताडपत्री ओव्हरहेड वायरवर पडली. त्यामुळे वर्सोव्याच्या दिशेने जाणारी मेट्रो वाहतूक तत्काळ थांबवण्यात आली. त्यामुळे मेट्रो गाड्यांच्या एकामागे एक अशा रांगा लागल्या होत्या. दरम्यान, मेट्रो प्रशासनाने तत्काळ धाव घेत सव्वाएकच्या सुमारास ताडपत्री काढल्यानंतर मेट्रो सेवा पूर्ववत झाली.