वाशी, ता. १७ (बातमीदार) : नवी मुंबई महापालिकेने श्वान परवान्यांची ऑनलाइन सुविधा सुरू केली असून, महापालिका कार्यक्षेत्रातील पाळीव श्वान मालकांना नोंदणी करण्याचे आवाहन मे महिन्यात केले होते. या आवाहनाला उत्स्फूर्त प्रतिसाद मिळत असून, ६७ नवीन श्वानांचे परवाने आणि ४७ श्वानांच्या परवान्यांचे नूतनीकरण झाले आहे.
नवी मुंबई महापालिकेच्या माध्यमातून कुत्र्यांवरील कर नियमन १९९३ ही उपविधी लागू करण्यात आली आहे. या उपविधीनुसार विभाग कार्यालयांमार्फत श्वान परवाने देण्याची कार्यवाही करण्यात येते. श्वान परवाने मिळविण्यासाठी श्वान मालकांना विभाग कार्यालयात जावे लागत होते. त्यामुळे परवान्यांचे प्रमाण कमी असल्याचे लक्षात घेऊन महापालिकेने यंदा ऑनलाइन पद्धतीने परवाने देण्याची सुविधा उपलब्ध करून दिली. मालकांनी आपल्या श्वानांचे परवाने घेण्याचे आवाहन मे महिन्यात केले होते. अनधिकृतपणे श्वान पाळणाऱ्या मालकांविरुद्ध दंडात्मक कारवाईचा इशारा प्रशासनाने दिला होता. महापालिकेच्या ऑनलाइन सुविधेला श्वान मालकांनी प्रतिसाद दिला असून, मागील वर्षभरात शहरामध्ये ४७२ नवीन श्वान परवाने आणि नूतनीकरण झाले होते. महापालिकेतर्फे ऑनलाइन सुविधा असल्यामुळे यंदा एक महिन्याच्या कालावधीत ११४ नवीन श्वानांचे परवाने आणि नूतनीकरण झाले आहे.
------------------
सिंगल क्लिकवर श्वान परवान्यांची सुविधा महापालिकेने उपलब्ध करून दिली आहे. या सुविधेला चांगला प्रतिसाद मिळत असून, नवी मुंबई महापालिका क्षेत्रातील नागरिकांनी प्रत्येक पाळीव श्वानाचा परवाना घेणे, तसेच त्याचे वेळोवेळी नूतनीकरण करणे बंधनकारक आहे.
- डॉ. श्रीकांत तोडकर, पशुवैद्यकीय अधिकारी, नवी मुंबई महापालिका