माणगाव, ता. १९ (बातमीदार) ः एसटी बसमधून प्रवास करणाऱ्या महिलेचे दागिने चोरीस गेल्याची घटना महिनाभरापूर्वी घडली होती. गोरेगाव पोलिसांनी सीसीटीव्ही फुटेज आणि पूर्वेतिहास तपासून चोरी करणाऱ्या महिलेला अटक केली. तिच्याकडून दोन लाख १२ हजार ५०० रुपयांचे दागिने हस्तगत केले. रविना अनिकेत पोळेकर (रा. विक्रोळी, मुंबई) या १६ मे रोजी लोणेरे येथून गोरेगाव-मुंबई या बसने मुंबई येथे जात होत्या. लोणेरे ते माणगावदरम्यान त्यांच्या पर्समधील सोन्याचे दागिने व रोख असा एकूण दोन लाख ६३ हजार ५०० रुपये किमतीचा ऐवज लंपास झाल्याचे त्यांच्या लक्षात आले. याबाबत त्यांनी तक्रार केल्यावर गोरेगाव पोलिसांनी गुन्हा दाखल केला होता.
लोणेरे येथील सीसीटीव्ही फुटेजच्या आधारे गोरेगाव पोलिसांनी तपास सुरू केला असता, तक्रारदार महिला गाडीत चढताना एका महिलेच्या हालचाली संशयास्पद वाटल्या. पोलिसांनी या महिलेच्या फोटोवरून, माणगाव, महाड या पोलिस ठाण्यातील अभिलेखाची पडताळणी केली असता तिचे नाव शोभा ऊर्फ मंगल अंकुश साठे ऊर्फ लता पोपट कांबळे (५४, रा. भाटघर-सातारा) असल्याची माहिती मिळाली. त्यानुसार गोरेगाव पोलिसांनी रविवारी (ता. १५) साताऱ्यातून अटक केली. तिच्याकडून दोन लाख १२ हजार ५०० रुपयांचा चोरीचा मुद्देमाल हस्तगत करण्यात आला आहे.
महिलेवर सात गुन्हे दाखल
शोभा साठे या महिलेविरोधात यापूर्वी गोरेगाव पोलिस ठाण्यात एक, महाड शहर पोलिस ठाण्यात तीन, दापोलीतील पोलिस ठाण्यात दोन, तर लोणंद पोलिस ठाण्यात एक असे सात गुन्हे दाखल असल्याची माहिती गोरेगाव पोलिसांना मिळाली आहे. शोधकार्यात पोलिसांनी दाखवलेल्या तत्परतेबद्दल जिल्हा पोलिस अधीक्षक आंचल दलाल यांनी कौतुक केले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.