अंधेरीत रिक्षाच्या धडकेत वृद्धाचा मृत्यू
अंधेरी, ता. १९ (बातमीदार) ः भरवेगात जाणाऱ्या एका रिक्षाच्या धडकेत ६० वर्षांच्या वृद्धाचा मृत्यू झाला. मृत वयोवृद्धाची ओळख पटली नसून त्याचा मृतदेह शवविच्छेदनासाठी कूपर रुग्णालयात पाठविण्यात आला आहे. प्राथमिक तपासात तो भिक्षेकरू असून याच परिसरात गेल्या दोन ते तीन महिन्यांपासून शिक्षा मागत असल्याचे काही प्रत्यक्षदर्शीने पोलिसांना सांगितले.
अपघातानंतर पळून गेलेल्या रिक्षाचालकाने नंतर सहार पोलिसांपुढे आत्मसमर्पण केले होते. सोहराब महफुज हुसैन शेख असे या आरोपी रिक्षाचालकाचे नाव असल्याचे पोलिसांनी सांगितले. हा अपघात सोमवारी (ता. ९) सकाळी साडेआठ वाजता अंधेरी-कुर्ला रोडने अंधेरीकडे जाणाऱ्या मेट्रो स्टेशन गेट क्रमांक चारजवळील उत्तर वाहिनीवर झाला. मृत व्यक्ती भिक्षेकरू असून ९ जूनला तो मेट्रो स्टेशन क्रमांक चारसमोर रस्ता ओलांडत होता. या वेळी एका रिक्षाने त्याला धडक दिली होती. त्यात तो गंभीररीत्या जखमी झाला होता. सहार पोलिसांनी घटनास्थळी धाव घेतली होती. जखमी वृद्धाला पोलिसांनी तातडीने कूपर रुग्णालयात दाखल केले, तिथे उपचार सुरू असताना सकाळी साडेअकरा वाजता त्याचा मृत्यू झाला. त्याची ओळख पटेल अशी कोणतीही वस्तू सापडली नाही. पोलिसांनी हलगर्जीने रिक्षा चालवून एका वयोवृद्धाच्या मृत्यूस कारणीभूत ठरल्याप्रकरणी चालकावर गुन्हा दाखल केला होता. हा गुन्हा जामीनपात्र असल्याने नंतर त्याची जामिनावर सुटका करण्यात आली.