मुजोर रिक्षाचालकांमुळे अडतेय रुग्णांची वाट
तुर्भे, ता. २३ (बातमीदार) ः वाशीतील नवी मुंबई महापालिकेच्या प्रथम संदर्भ रुग्णालयासमोर उभ्या असलेल्या बेशिस्त रिक्षाचालकांमुळे रुग्णांची गैरसोय होत आहे. वाहतूक कोंडीमुळे रुग्णांना मनस्‍ताप सहन करावा लागत असल्याने त्‍यांच्यावर कारवाई करावी, अशी मागणी रुग्णांच्या नातेवाइकांकडून करण्यात आली आहे.
वाशी सेक्टर १० येथे नवी मुंबई महापालिकेच्या प्रथम संदर्भ रुग्णालयात मोठ्या प्रमाणात रुग्ण दाखल होतात. विशेष म्‍हणजे नवी मुंबईतील सर्वात मोठे शासकीय रुग्णालय असल्याने या ठिकाणी नवी मुंबईसह मुंबई, उरण, पनवेल आदी ठिकाणांहून रोज शेकडो रुग्ण उपचारासाठी येत असतात. त्याचसोबत अपघातग्रस्त, अत्यवस्थ रुग्णांनादेखील रुग्णवाहिकेतून या ठिकाणी आणले जाते, मात्र रुग्णालयाबाहेर बेशिस्‍त रिक्षाचालकांमुळे रुग्णांची वाट अवघड झाली आहे. रुग्णालयाला नेहमीच बेशिस्‍त रिक्षाचालकांचा वेढा दिसून येतो. रुग्णालयासमोरील रस्त्यावर दोन्ही बाजूंनी नो-पार्किंग झोन असतानादेखील वाहने दुतर्फा पार्क केली जातात. त्यामुळे वाहतूक कोंडी होऊन दवाखान्यात ये-जा करणाऱ्या रुग्ण वाहिकांना वाट काढणे कठीण होऊन जाते. त्‍यामुळे ही वाहतूक कोंडी अत्यवस्थ रुग्णांच्या जीवावर बेतू शकते. यामुळे येथील रस्ता मोकळा ठेवण्याची मागणी रुग्णांच्या नातेवाइकांकडून करण्यात येत आहे.
याशिवाय हॉस्पिटललगतच सेंट मेरीज स्कूल, साईनाथ हायस्कूल आणि राजीव गांधी कॉलेज, अंजुमन इस्लाम स्कूल, पलीकडे फादर ॲग्नेल स्कूल, इंजिनिअरिंग कॉलेज तसेच आयसीएल महाविद्यालय आहे. सेक्टर-९ ए परिसरात नूर मस्जिद, गुरुद्वारा, शिव-विष्णू मंदिर, झुलेलाल मंदिर, योग विद्या भवन आणि विविध संस्थांची समाजमंदिरे आहेत. त्‍यामुळे या रस्त्यावर नेहमीच वाहतूक कोंडीचा सामना स्थानिकांसह रुग्णांना करावा लागत आहे.
........................
कोट
वाशीतील प्रथम संदर्भ रुग्णालयासमोर नो-पार्किंग झोनमध्ये उभ्या असलेल्या रिक्षाचालकांवर वाहतूक शाखेमार्फत नित्याने कारवाई केली जात आहे.
-दिलीप गुजर, वाहतूक पोलिस निरीक्षक, वाशी शाखा
................
रुग्णालयाबाहेर बेशिस्‍त रिक्षाचालकांमुळे नेहमी वाहतूक कोंडी होते. वाहतूक विभागाच्या कारवाईनंतर काही तास रस्‍ता मोकळा असतो, मात्र त्‍यानंतर पुन्‍हा रस्‍त्‍यावर कोंडी दिसून येते.
-अमोल रावराणे, रुग्णवाहिका चालक