सकाळ वृत्तसेवा
ठाणे, ता.२१ : ठाणे महापलिका हद्दीतील अनेक सखल भागांमुळे पाणी तुंबण्याच्या घटना घडतात. शहरातील अशा १४ ठिकाणी यादी जाहीर करताना परिवहन विभागाने दुर्घटनेच्या भीतीने इलेट्रिक बसला जाण्यास मज्जाव केला आहे.
ठाणे शहरातील अंतर्गत रस्त्यांवर सार्वजनिक वाहतूक सेवा ठाणे पालिकेच्या परिवहन विभागामार्फत देण्यात येते. त्यामुळे ठाणेकरांबरोबर बोरिवली, मीरारोड, भिवंडी, मुलुंड, कल्याण परिसरातील प्रवाशांसाठी ही सुविधा जीवनवाहिनीप्रमाणेच आहे. प्रवाशाच्या आरामदायी प्रवासासाठी परिवहनच्या ताफ्यात वातानुकूलित पर्यावरण पूरक सीएनजी तसेच इलेक्ट्रिकच्या १२३ बस विविध मार्गांवर धावत आहेत. यात बॅटरीवर चालणाऱ्या इलेट्रीक बसला साचलेल्या पाण्यात दुर्घटना होण्याचा धोका आहे. त्यामुळे पावसाळ्यात पाणी साचणाऱ्या ठिकाणांवर बस घेऊन जाण्यास मज्जाव करण्यात आला असून तशा सूचना चालकांबरोबर वाहकाला दिल्या गेल्या आहेत.
...............................
१४ ठिकाणांचा समावेश
ठाणे पालिकेचे सर्वेक्षण करून पाणी तुंबण्याच्या ठिकाणांची एक यादी तयार केली आहे. यामध्ये वंदना टॉकीज, चिखलवाडी भास्कर कॉलनी, डेबोनायर सोसायटी अल्मेडा रोड, आनंद नगर व्यायाम शाळा कोपरी, आनंद नगर गल्ली क्रमांक एक कोपरी, दादर अळी डॉक्टर बाबासाहेब आंबेडकर रस्ता, लवकुश गृहनिर्माण संस्था, सिडको रेल्वे पूल, गुन्हे शाखा पोलिस वसाहत, पेढ्या मारुती मंदिर, शिवरत्न गल्ली किसन नगर, दत्तवाडी, विटावा रेल्वे पुलाखाली बेलापूर रस्ता आणि दिवा गाव अशा १४ ठिकाणांचा समावेश आहे.