किन्हवली, ता.२१(बातमीदार)ः गावातील स्थानिक राजकारण, श्रेयवाद, जागेची वहिवाट, हक्क अशा विविध कारणांमुळे शेंद्रूणच्या(खू) स्मशानभूमीचे काम मार्गी लागले नाही. त्यामुळे मृतदेहांवर उघड्यावर अग्निसंस्कार करण्याची वेळ ग्रामस्थावर आली आहे.
शहापूर तालुक्यातील शेंद्रुण खुर्द गावाासाठी २०१४-१५ दीड किलोमीटर अंतरावर खाडेपाडा येथे स्मशानभूमी बांधण्यात आली होती. परंतु, काही ग्रामस्थांनी तिथे अंत्यविधी करण्यास विरोध केल्याने वापराविना पडून आहे. अडीच वर्षांपूर्वी शेंद्रृण येथे वन जमिन मिळविण्यासाठी वनहक्क कायदा, २००६ च्या कलम ३(२) मधील तरतुदीनुसार, ग्रामसभेच्या ठरावाद्वारे तत्कालीन उपसरपंच अरुणा भोईर यांच्या प्रयत्नाने सहा गुंठे जागा उपलब्ध केली. अद्ययावत स्मशानभूमीसाठी ठाणे जिल्हा परिषदेतून जनसुविधा योजनेतून दहा लाखांचा निधी देखील मंजूर करण्यात आला. मात्र,काही ग्रामस्थांनी वहिवाटीचा दावा केल्याने स्मशानभूमीचे काम रखडल्याने मंजूर निधी वापरा अभावी पुन्हा वर्ग झाला आहे. त्यामुळे गावकऱ्यांचे स्थानिक राजकारण, श्रेयवाद, जागेची वहिवाट, हक्क अशा अनेक कारणांमुळे शेंद्रूणच्या स्मशानभूमीचे काम मार्गी रखडले असून मृतदेहांवर उघड्यावर अग्निसंस्कार करावे लागत आहेत.
------------------------------------
शेंद्रूण खुर्द गावाच्या स्मशानभूमीसाठी निधी आणण्याचा प्रयत्न सुरु आहे. ग्रामस्थांशी चर्चा करून उपलब्ध जागेवर स्मशानभूमी बांधण्यात येईल.
ः- अरुणा भोईर, माजी उपसरपंच, शेंद्रूण