पालिका निवडणुकीआधी उद्‌घाटनाचा उडणार बार
१,५०० कोटींच्या कामाचे होणार लोकार्पण
वाशी, ता. २४ (बातमीदार) ः नवी मुंबई महापालिकेच्या निवडणुकांसाठी प्रशासनाकडून प्रभाग रचना करण्याचे काम सुरू करण्यात आले आहे. या वेळी पालिका क्षेत्रामधील जवळपास १,५०० कोटी रुपयांच्या प्रकल्पांचे उद्‌घाटन करण्यात येणार आहे. पालिका निवडणुकीची आचारसंहिता लागण्याआधी या कामाचे लोकार्पण करण्यात येणार आहे. पालिकेकडून या उद्‌घाटनासाठी राज्याचे मुख्यमंत्री देवेंद्र फडणवीस यांच्या हस्ते करण्यासाठी त्यांची वेळदेखील घेण्यात आली आहे. मुख्यमंत्र्यांची वेळ मिळाल्यानंतर उद्‌घाटनाच्या कामाचा बार उडणार आहे.
राज्य निवडणूक आयोगाच्या सूचनेनुसार नवी मुंबई महापालिका निवडणुकांचे बिगुल वाजले आहे. त्‍यानुसार प्रभागरचना करण्याचे काम पालिकेकडून करण्यात येत आहे. पालिकेच्या निवडणुका या डिसेंबरपर्यंत लागण्याची शक्यता प्रशासनाकडून व्यक्त केली जात आहे. तर पालिका निवडणुकांसाठी इच्छुक असणाऱ्या उमेदवारांकडूनदेखील कंबर कसली जात आहे. पालिका निवडणुका लागण्याआधी पालिकेची प्रगतिपथावर असणारी कामे पूर्ण करून त्यांच्या उद्‌घाटनाचा बार उडविण्यात येणार आहे. पालिकेकडून या उद्‌घाटनासाठी मुख्यमंत्री देवेंद्र फडणवीस यांची वेळ मागण्यात आली आहे. मुख्यमंत्र्यांची वेळ मिळाल्यानंतर विविध वास्‍तूंच्या लोकार्पणाचे कार्यक्रम पार पडणार आहेत. जवळपास १,५०० कोटी रुपयांच्या विकासकामाचे लोकार्पण या वेळी करण्यात येणार आहे. यामध्ये नेरूळ येथील छत्रपती शिवाजी महाराज यांचा पुतळा, घनकचरा संकलन व वाहतूक, अमृत दोनअंतर्गत पाणीपुरवठा स्काडा प्रकल्प, कोपरखैरणे येथील धारण तलाव, वाशी बस डेपो, तुर्भे व दिघा येथी पाण्याची टाकी, जुईनगर येथील पशुवैद्यकीय तसेच मीनाताई ठाकरे रुग्णालयाचे उद्‌घाटन होणार आहे.