वंदना एसटी आगाराचे ग्रहण सुटले
तासाला अडीच लाख लिटर पाणी उपसा करणारा पंप बसवला, प्रवाशांना दिलासा
ठाणे शहर, ता. २२ (बातमीदार) ः वंदना एसटी आगार परिसर सखल भागात असल्याने पावसात येथे पूरसदृश परिस्थिती निर्माण होते. त्यासाठी ठाणे महापालिकेने पाण्याचा उपसा करण्यासाठी येथे पंप बसवला होता; परंतु तो जमिनीवर असल्याने पंपात पावसाचे पाणी जाऊन तो अनेकदा बंद पडत होता. अखेर आता ठाणे महानगरपालिकेने येथे पाण्यात चालणारा उच्च क्षमतेचा पंप बसवला असून तो तासाभरात अडीच लाख लिटर पाण्याचा उपसा करणार आहे. यामुळे एसटी आगाराचे पाण्याचे ग्रहण अखेर सुटल्याची भावना प्रवाशांनी व्यक्त केली आहे.
ठाण्यातील वंदना एसटी आगार जुन्या आग्रा मार्गावर आहे. ठाण्याच्या मध्यभागात हे आगार असल्याने येथे प्रवाशांची मोठी गर्दी असते; परंतु प्रत्येक पावसात हा परिसर पाण्याखाली जातो. त्यामुळे एसटीसह रिक्षा आणि इतर वाहनांना याचा मोठा फटका बसतो. नागरिकांनाही या पाण्यातून वाट काढावी लागत होती. यामुळे ठाणे महानगरपालिकेकडून या ठिकाणी १५ अश्वशक्तीचा पाणी उपसा पंप बसवला आहे. या पंपाची तासाला अडीच लाख लिटर पाणी उपसा करण्याची क्षमता असल्याचा दावा ठेकेदाराने केला आहे. एसटी बस आणि इतर वाहनांची वाहतूकदेखील आता सुरळीत होणार आहे. नागरिकांची पाण्याच्या त्रासातून सुटका होणार असल्याने समाधान व्यक्त केले.

स्वयंचलित पंप
नवा पंप हौदसदृश खड्डा तयार करून बसवण्यात आला आहे. परिसरात पाणी साचू लागताच पंप स्वयंचलित सुरू होऊन पाण्याचा उपसा होणार आहे. त्यामुळे त्याच्या चालकाची गरज लागणार नाही, असेही ठेकेदाराकडून सांगितले आहे. याअगोदर येथे साचलेल्या पाण्याचा उपसा करण्यासाठी डिझेलवर चालणाऱ्या पंपाचा वापर केला जात होता; मात्र तो सुरू करण्यासाठी भर पावसात पंपचालकांना येथे उभे राहावे लागत होते. पाण्याचा उपसा करताना तो साचलेल्या पाण्यानुसार बंद- चालू करावा लागत असे; परंतु आता ही समस्या दूर झाली आहे. पाणी उपसा करणारा पंप जमिनीखाली ठेवून त्यावर काँक्रीटीकरण केले जाणार असल्याने फुटपाथदेखील चालण्याजोगा होणार आहे.