वाशी, ता. २३ (बातमीदार) : ऐरोली येथील भारतरत्न डॉ. बाबासाहेब आंबेडकर स्मारकात राजर्षी छत्रपती शाहू महाराज जयंतीचे औचित्य साधून मंगळवारी (ता. २४) व्याख्यानाचे आयोजन करण्यात आले आहे. मंगळवारी सायंकाळी ६.३० वाजता सुप्रसिद्ध व्याख्याते प्रा. गोपाल गुरु ‘राजर्षी छत्रपती शाहू महाराज आणि डॉ. बाबासाहेब आंबेडकर यांचा शिक्षणविषयक आधुनिक दृष्टिकोन’ या विषयावर ते मार्गदर्शन करणार आहेत. ‘इकॉनॉमिक अँड पॉलिटिकल विकली’ या नियतकालिकाचे संपादक असलेले प्रा. गोपाल गुरु राज्यशास्त्राचे नामांकित अभ्यासक, प्राध्यापक आणि लेखक आहेत. सामाजिक न्याय आणि समता या विचारधारेवर सर्वस्पर्शी लेखन करणारे प्रा. गोपाल गुरु यांच्या व्याख्यानाप्रसंगी नागरिकांनी मोठ्या संख्येने उपस्थित राहावे, असे आवाहन महापालिकेच्या वतीने करण्यात आले आहे.