भाईंदर, ता. २३ (बातमीदार) : भाईंदरजवळील डोंगरी गावातील प्रस्तावित मेट्रो कारशेडसाठी होऊ घातलेल्या वृक्षतोडीला नागरिकांनी तीव्र विरोध केला आहे. या वृक्षतोडीला विरोध करणारे हजारो सह्यांचे निवेदनही राज्य सरकारला देण्यात आले आहे. आता यावर राज्य सरकार काय भूमिका घेते, याकडे नागरिकांचे लक्ष लागले आहे. सरकारकडून सकारात्मक प्रतिसाद मिळाला नाही, तर आंदोलनाची पुढील दिशा ठरविण्यात येणार आहे आणि प्रसंगी न्यायालयात जाण्याची तयारी सुरू करण्यात आली आहे.

डोंगरी गावात होणाऱ्या कारशेडसाठी सुमारे १२ हजार झाडे तोडण्यात येणार आहे. त्याला स्थानिक पातळीवर विरोध करण्यात येत आहे. या वृक्षतोडीविरोधात सामाजिक कार्यकर्त्यांनी सह्यांची मोहीम राबवली. यादरम्यान २१ हजारांहून अधिक नागरिकांनी आपला विरोध दर्शवत निवेदनावर सह्या केल्या आहेत. हे निवेदन आंदोलनकर्त्यांच्या शिष्टमंडळाने नुकतेच उपमुख्यमंत्री एकनाथ शिंदे यांना दिले. त्यावर अहवाल सादर करण्याचे आदेश उपमुख्यमंत्र्यांनी दिले आहेत. याव्यतिरिक्त आंदोलनकर्ते लवकरच वनमंत्री गणेश नाईक यांचीदेखील भेट घेणार आहेत. ही निवेदने देण्यात आल्यानंतर सरकार पातळीवर वृक्षतोडीसंदर्भात काय निर्णय घेतला जातो, याकडे सर्वांचे लक्ष लागून राहिले आहे. या पार्श्वभूमीवर काही दिवसांपूर्वी कारशेडच्या जागेत असलेली काही झाडे तोडण्याचे काम सुरू करण्यात आले होते, मात्र नागरिकांनी तीव्र विरोध केल्यानंतर काम बंद करण्यात आले.

वृक्षतोडीविरोधात सुरू करण्यात आलेल्या आंदोलनाची पुढील दिशा ठरविण्यासाठी एक जाहीर सभा रविवारी (ता. २२) सायंकाळी उत्तनमध्ये घेण्यात आली. या सभेला पर्यावरणप्रेमी, सामाजिक कार्यकर्ते, सेवाभावी संस्थांचे प्रतिनिधी, लोकप्रतिनिधी, उत्तन व आसपासच्या गावातील, तसेच भाईंदरमधील नागरिक उपस्थित होते. त्यात वृक्षतोडीसंदर्भात दिलेल्या निवेदनावर सरकारचा निर्णय होईपर्यंत वाट पाहण्याचा निर्णय घेण्यात आला. यादरम्यान, वृक्षतोडीला विरोध सुरू ठेवण्यासाठी जनजागृती करणे, निवेदने देणे आदी छोटी आंदोलने सुरू ठेवण्याचेही नक्की करण्यात आले.

सरकारचा निर्णय सकारात्मक आला नाही, तर आंदोलनाची पुढील दिशा नक्की केली जाईल व आवश्यकता भासल्यास न्यायालयातही धाव घेण्यात येईल, असा निर्णय सभेत घेण्यात आला, अशी माहिती उत्तनच्या माजी नगरसेविका शर्मिला गंडोली यांनी दिली.