तुर्भे, ता. २३ (बातमीदार) : पावसाळा सुरू झाला की बहुतांश लोकांच्या आहारात अंड्यांचा समावेश होतो. पावसाळा सुरू झाला की समुद्रातील मासेमारी बंद असते. त्यामुळे मांसाहार करणाऱ्यांना अंड्यावर ताव मारावा लागतो. वाढत्या मागणीमुळे सध्या अंड्याचे भाव वाढले आहेत. गेल्या महिन्यात ७० रुपये डझन मिळणारी अंडी सध्या ८० रुपये डझनाने मिळत आहेत.
अंडी शरीरासाठी अधिक ऊर्जा देणारा घटक असल्याने अंडी खाणे शरीरासाठी चांगले असते. अंडी खाल्ल्याने प्रथिने, विविध जीवनसत्वे, खनिजे, लोह, आयोडीन, झिंक असे बहुतांशी घटक शरीराला मिळत असतात. मानवी शरीरासाठी आवश्यक असणारे सर्व पोषणमूल्य अंड्यातून मिळत असल्याने शारीरिक तंदुरुस्ती राहण्यास मदत होते. त्याचमुळे आहारात नियमितपणे अंडी आवश्यक असल्याचा सल्ला तज्ज्ञ, डॉक्‍टर देत असतात. पावसाळ्यात कोंबड्यांची संख्या घटते, त्यामुळे अंड्यांचा पुरवठा कमी होतो. पावसाळ्यामुळे वाहतूक आणि वितरणामध्ये अडचणी येतात, ज्यामुळे अंड्यांच्या किमती वाढतात. मासेमारी बंद असल्यामुळे अनेकांचा मोर्चा अंड्यांकडे वळतो. त्यामुळे या काळात भाववाढ होते.