पनवेल, ता. २४ (वार्ताहर) : मुख्य चौकात असलेल्या भारतीय संसद भवनाच्या प्रतिकृतीवर चढून डॉ. बाबासाहेब आंबेडकर यांच्या पुतळ्याचे नुकसान करण्याचा प्रयत्न एका व्यक्तीने सोमवारी (ता. २३) सकाळी केला. पोलिसांनी वेळीच या व्यक्तीला ताब्यात घेतल्याने पुढील अनर्थ टळला. पनवेल शहर पोलिसांनी त्याला ॲट्रॉसिटी कायद्यानुसार अटक केली आहे.
अटक करण्यात आलेला आरोपी शैलू ऊर्फ गोला पंडित अशोक शुक्ला (३८) हा करंजाडे भागात राहण्यास असून, तो भंगार विकण्याचे काम करतो. सोमवारी सकाळी पावणेअकरा वाजण्याच्या सुमारास आरोपी शैलू पनवेलमधील मुख्य चौकातील डॉ. बाबासाहेब आंबेडकर यांचा पुतळा असलेल्या परिसरात घुसला होता. त्यानंतर त्याने तेथील भारतीय संसद भवनाच्या प्रतिकृतीवर चढून डॉ. बाबासाहेबांच्या पुतळ्याला धरून आरडाओरड करण्यास सुरुवात केली होती. या प्रकारामुळे त्या ठिकाणी बघ्यांची गर्दी झाली. शैलू डॉ. बाबासाहेब आंबेडकर यांच्या पुतळ्यास नुकसान पोहोचविण्याचा प्रयत्न करीत असल्याने त्या ठिकाणी आलेल्या वाहतूक पोलिसांनी नागरिकांच्या मदतीने त्याला खाली खेचले. त्यानंतर त्याला ताब्यात घेऊन पनवेल शहर पोलिस ठाण्यात नेले. पोलिसांनी त्याच्या विरोधात ॲट्रॉसिटी कायद्यानुसार गुन्हा दाखल करून त्याला अटक केली आहे.