मुरबाड, ता. २३ (वार्ताहर)ः मुरबाड तालुक्यातील मढ शासकीय आश्रमशाळेसाठी आदिवासी विकास प्रकल्प शहापूरअंतर्गत नवीन सुसज्ज इमारत ठेकेदारामार्फत हस्तांतरित करण्यात आली आहे; पण विद्युत, पाणी, स्वच्छतागृहे, वर्गखोल्या, निवास व्यवस्था असूनही शाळा मात्र अद्यापही जीर्ण तसेच मोडकळीस आलेल्या जुन्या इमारतीतच सुरू असल्याने श्रमजीवी संघटना आक्रमक झाली आहे.
श्रमजीवी संघटनेने नुकतेच प्रकल्प अधिकारी राजेंद्र कुमार हिवाळे यांची भेट घेतली होती. या भेटीत शासनाने नवीन इमारत मंजूर केली असताना जुन्या इमारतीसाठी नाहक खर्च होत असल्याची बाब मांडली होती. तसेच, ठरावीक मुदतीत शाळा नवीन इमारतीत सुरू झाली नाही, तर श्रमिक मुक्ती संघटना शहापूर प्रकल्प कार्यालयावर तीव्र आंदोलन करील, असा इशारा पत्रातून देण्यात आला आहे.