अलिबाग, ता. २४ (वार्ताहर) ः जिल्हा क्रीडा अधिकारी कार्यालय आणि प्रिझम सामाजिक विकास संस्थेच्या विद्यमाने आंतरराष्ट्रीय ऑलिंपिकदिनाचे औचित्य साधून क्रीडा अधिकारी प्रकाश वाघ यांच्या प्रमुख मार्गदर्शनाखाली ऑलिंपिक मशाल रॅलीचे आयोजन करण्यात आले होते. रॅलीत रायगड जिल्ह्यातील स्पर्धा विश्व अकॅडमीचे विद्यार्थी, प्रिझम संस्थेचे कार्यकर्ते, विविध शाळा, महाविद्यालये, क्रीडा संस्था व खेळाडूंनी उत्स्फूर्त सहभाग घेतला. ऑलिंपिक चळवळीचे महत्त्व, खेळांमधील एकता आणि जागतिक बंधुत्वाचा संदेश देणारी ही रॅली अलिबाग शहरातील प्रमुख मार्गावरून उत्साहात काढण्यात आली. कार्यक्रमाच्या प्रारंभी मान्यवरांच्या हस्ते ऑलिंपिक मशालीचे पूजन करण्यात आले. या वेळी क्रीडा अधिकारी राजेंद्र आतनूर, आंतरराष्ट्रीय खेळाडू पौर्णिमा सकपाल, आंतरराष्ट्रीय खेळाडू तथा राष्ट्रीय युवा पुरस्कारार्थी भारत सरकार तपस्वी गोंधळी, क्रीडा मार्गदर्शक यतीराज पाटील, प्रिझम संस्थेचे पदाधिकारी, शिक्षक, प्रशिक्षक आदी उपस्थित होते. रॅलीत सहभागी झालेल्या खेळाडूंना, क्रीडाप्रेमींना क्रीडा अधिकारी राजेंद्र आतनूर यांनी क्रीडा क्षेत्रात उत्तम कामगिरी करण्याकरिता शुभेच्छा दिल्या तसेच ऑलिंपिकदिनाचे महत्त्व सांगितले.