नवी मुंबई, ता. २४ (वार्ताहर) : एपीएमसी पोलिसांनी दुचाकी वाहने चोरणाऱ्या दोन अल्पवयीन मुलांना ताब्यात घेतले आहे. या दोन्ही अल्पवयीन मुलांनी चार दुचाकी चोरल्याचे तपासात आढळून आले असून पोलिसांनी त्यांच्याकडून चारही गाड्या हस्तगत केल्या आहेत.
एपीएमसीतील धान्य बाजारातून १० जूनला एक दुचाकी चोरीला गेली होती. याबाबत एपीएमसी पोलिस ठाण्यात गुन्हा दाखल झाल्यानंतर वरिष्ठ पोलिस निरीक्षक अजय शिंदे यांच्या मार्गदर्शनाखाली सहाय्यक पोलिस निरीक्षक नीलेश पाटील, पोलिस हवालदार माने, सुनील पाटील, पोलिस नाईक जगदाळे, हरड, जाधव, नलावडे आदींच्या पथकाने एपीएमसी परिसरातील सीसीटीव्ही फुटेजची तपासणी केली. त्यानंतर पोलिसांनी गुप्त माहितीच्या आधारे आरोपींचा माग काढला. तपासादरम्यान दुचाकी चोरी प्रकरणातील संशयित आरोपी ग्रीन पार्क झोपडपट्टी परिसरात वास्तव्यास असल्याची माहिती पोलिसांना मिळाली. त्यानंतर पोलिसांनी ग्रीन पार्क झोपडपट्टीमध्ये सापळा लावून त्या भागातून दोन अल्पवयीन मुलांना ताब्यात घेतले. त्या दोघांची चौकशी केली असता, दुचाकी चोरी त्यांनीच केल्याचे निष्पन्न झाले. त्यानंतर पोलिसांनी त्यांची अधिक चौकशी केली असता, त्यांनी एपीएमसी पोलिस ठाण्याच्या हद्दीतून आणखी दोन आणि रबाळे पोलिस ठाण्याच्या हद्दीतून एक अशा एकूण चार दुचाकी चोरल्याची कबुली दिली. त्यानुसार पोलिसांनी सर्व गाड्या जप्त करून त्यांच्यावर पुढील कारवाई सुरू केली आहे.