वाशी, ता. २५ (बातमीदार) : शिवसाई माथाडी मित्र मंडळ आणि नेरूळ येथील डी. वाय. पाटील रुग्णालयाच्या संयुक्त विद्यमाने व शिवसाई चॅरिटेबल ट्रस्टच्या माध्यमातून घणसोली येथे आयोजित करण्यात आलेल्या मोफत आरोग्य शिबिराला उत्स्फूर्त प्रतिसाद मिळाला. हे शिबिर भाजपचे माजी महामंत्री कृष्णा पाटील व माजी नगरसेविका उषा पाटील यांच्या कार्यालयाच्या समोरील मोकळ्या जागेवर आयोजित करण्यात आले होते. या वेळी विविध आजारांवर चिकित्सा करून आवश्यकता असणाऱ्यांना मोफत औषधवाटप करण्यात आले. या शिबिराचा लाभ येथील ५००हून अधिक नागरिकांनी घेतला. या शिबिरात जनरल मेडिसिन, नेत्ररोग, शस्त्रक्रिया, कान- नाक- घसा, त्वचारोग, बालरोग, महिलांच्या विविध आजारांवर वैद्यकीय तज्ज्ञांकडून तपासणी करण्यात आली. या वेळी मोतीबिंदूचे आजार असलेल्या रुग्णांवर मोफत शस्त्रक्रिया करण्यात येणार असल्याचे आयोजक कृष्णा पाटील यांनी सांगितले.