आदिवासी विद्यार्थ्यांना सायकलवाटप
सकाळ वृत्तसेवा
डोंबिवली, ता. २५ : वाडा तालुक्यातील गाव काटी येथील जिल्हा परिषद शाळेतील विद्यार्थ्यांसाठी आपुलकी चॅरिटेबल ट्रस्टच्या वतीने एक सामाजिक उपक्रम राबविण्यात आला. रविवारी या शाळेतील विद्यार्थ्यांना मोफत सायकल आणि शैक्षणिक साहित्याचे वाटप करण्यात आले. त्याचबरोबर विद्यार्थ्यांसोबत स्नेहभोजनाचे आयोजनही करण्यात आले होते.

उपक्रमासाठी ट्रस्टचे पदाधिकारी प्रशांत देसाई यांनी पुढाकार घेतला होता. त्यांच्या समवेत ट्रस्टचे सदस्य सहभागी होते. शाळेतील विद्यार्थ्यांना दररोज दोन ते तीन किलोमीटर अंतर पायी चालून शाळेत जावे लागत होते. त्यामुळे विद्यार्थ्यांना होणाऱ्या त्रासाची दखल घेत शाळेने आपुलकी ट्रस्टशी संपर्क साधला. ट्रस्टने या मागणीला सकारात्मक प्रतिसाद देत सुमारे २५ सायकली तसेच वह्या, पुस्तके, दप्तर, कंपास सेट आदी शैक्षणिक साहित्य विद्यार्थ्यांना भेट दिले.

सायकलवाटप केल्याने विद्यार्थ्यांचा शाळेपर्यंतचा प्रवास सुलभ होणार असून, शिक्षणात अधिक उत्साह निर्माण होईल, असा विश्वास शाळा प्रशासनाने व्यक्त केला. आपुलकी ट्रस्टच्या या सामाजिक कार्याचे सर्व स्तरातून कौतुक करण्यात येत आहे. विद्यार्थी आणि शिक्षकांनी ट्रस्टचे आभार मानले आहेत. दरम्यान, आपुलकी चॅरिटेबल ट्रस्टने यापूर्वीदेखील विविध भागात सामाजिक उपक्रम राबवले असून, गरजूंसाठी शिक्षण, आरोग्य आणि रोजगाराच्या दृष्टीने मदतकार्य करण्याचा वसा सातत्याने सुरू ठेवला आहे.