टोकावडे, ता. २५ (बातमीदार)ः मुरबाड तालुक्यात वांगी, मिरची, रताळेच्या वेलीची लागवड केली जाते. माळरानावर अशा रोपांच्या लागवडीतून भरघोस पीक येत असल्याने सरळगावच्या आठवडा बाजारात लहान रोपांची मागणी वाढली आहे.
सरळगावच्या आठवडा बाजारात तालुक्यातील शेतकरी भाजी, किराणा, सुकी मच्छी अशा वस्तू खरेदीसाठी येतात. तसेच बैल, म्हशींची मोठ्या प्रमाणात खरेदी-विक्रीसाठी शहापूर, नगर, ओतुर, आळेफाटा येथून अनेक व्यापारी येतात. त्यामुळे या बाजारात मोठ्या प्रमाणात व्यवहार होतात. त्यामुळे रोपांना ग्राहक चांगल्या प्रकारे मिळत असल्याचे बोलले जाते. परिसरातील अनेक शेतकरी उन्हाळ्यात बियांची पेरणी करून त्यांची जोपासणा करतात. नंतर पावसाळा सुरू झाल्यावर बाजारपेठेत लहान रोपांच्या जुडीची ९० ते १०० रुपयांना विक्री होते. मुरबाड, सरळगाव, धसई, म्हसा परिसरातील शेतकरीही रोप खरेदीसाठी येतात.
--------------------------------------
उत्पन्नाचे साधन
- मिरची, वांगी यांची लहान रोपे तयार करून विक्रीसाठी येतात. या रोपांची लागवड करण्यासाठी माळरानावर सरळ रेषेत माती ओढून लांबच्या लांब वाफे तयार केले जातात. त्यावर वांगी, मिरची तसेच रताळेची वेल लावली जाते. त्यापासून मोठ्या प्रमाणात उत्पन्न मिळते.
- रताळे कंदमुळे यांच्या वेलीपासून केली जाते. ठरावीक अंतरावर पेरावर वेलीला मुळे आलेली असतात. त्या पेरावर कट करून ही वेलीची मातीत तिरपी लागवड केली जाते. त्यामुळे या वेलीला मोठ्या प्रमाणात मागणी असते.