आझादनगरमध्ये अखेर नालेसफाई
टिटवाळा, ता. २५ (वार्ताहर) : काही दिवसांपूर्वी ‘सकाळ’मध्ये प्रसिद्ध झालेल्या ‘आझादनगरमधील चाळीत पुन्हा गटारातील पाणी’ या बातमीची अखेर प्रशासनाने दखल घेतली. वारंवार तक्रारी करूनही दुर्लक्षित केलेल्या भागात अखेर सफाईसाठी यंत्रणा उतरली. बुधवारी (ता. २५) सकाळपासूनच पालिकेने कर्मचारी आणि यंत्रसामग्री घेऊन संपूर्ण परिसरात स्वच्छता मोहीम राबवण्यात आली. गटारे उघडून त्यातील साचलेली घाण, प्लॅस्टिक, गाळ आणि सांडपाणी काढण्याचे काम युद्धपातळीवर सुरू झाले.

दोन दिवसांपूर्वी चाळीत घाण पाणी साचले होते. याबद्दल वृत्त ‘सकाळ’ने प्रसिद्ध केले होते. त्यानंतर आता पालिका प्रशासनाला जाग आली असून संपूर्ण यंत्रणा कामाला लागली आहे. कर्मचाऱ्यांनी विशेष सूट परिधान करून मशीनच्या साहाय्याने गटारात अडकलेला गाळ बाहेर काढला. काही भागात स्थानिक तरुणदेखील पुढे सरसावले आणि गटाराच्या काठावर वाढलेली झुडुपे व प्लॅस्टिक काढून परिसर स्वच्छ करण्यात हातभार लावला. ही स्वच्छता मोहीम एक दिवसाची असली तरी स्थानिकांसाठी हा मोठा दिलासा होता. अनेक महिन्यांपासून सतत गटार तुंबण्याच्या समस्या सोसणाऱ्या रहिवाशांच्या चेहऱ्यावर समाधान स्पष्टपणे झळकत होते. ‘सकाळ’ने आवाज उठवला, प्रशासन जागे झाले, त्यामुळे परिसरातील नागरिकांनी ‘सकाळ’चे आभार मानले.