माळशेज घाट असुरक्षित

मुरबाड, ता. २५(बातमीदार)ः कल्याण-माळशेज घाट रस्त्यावर आवळेवाडी येथे झालेल्या अपघातात एकाचा मृत्यू झाला होता. या घटनेनंतर संतप्त झालेल्या जमावाने महामार्ग पोलिसांच्या पेट्रोलिंगसाठीच्या दोन वाहनांचे नुकसान केले होते. त्यामुळे वाहने नादुरूस्त असल्याने माळशेज घाट महामार्गावर पेट्रोलिंग बंद असल्याने पर्यटकांची सुरक्षा दावणीला लागली आहे.
माळशेज घाटात फिरण्यासाठी आलेल्या पर्यटकांच्या वाहनाची दुचाकीला धडक बसल्याने स्थानिक तरुणाचा मृत्यू झाला होता. तर ठार दोन जण गंभीर जखमी आहेत. या घटनेनंतर परिसरातील ग्रामस्थांनी रस्त्यावर उतरून आंदोलन केले होते. यावेळी अपघातास कारणीभूत असलेल्या पर्यटकांना राष्ट्रीय महामार्ग पोलिस एका गाडीतून नेत असल्याने आंदोलनाला हिसंक वळण लागले. संतप्त जमावाने पोलिस पथकावरच हल्ला केला. तर वाहतूक विभागाच्या घाटात पेट्रोलिंग करणाऱ्या दोन गाड्या देखील फोडल्या आहेत.
------------------------------
पोलिसांवर हल्ला
या हल्ल्यात दहा पोलिस जखमी असून ५९ लोकांविरुद्ध गुन्हा नोंदविण्यात आला आहे. तर २९ लोकांना पोलिसांनी अटक केली आहे. पण पोलिसासोबत राष्ट्रीय महामार्ग उमरोलीच्या पोलिसांना देखील मार बसला अशी चर्चा आहे. याबाबत राष्ट्रीय महामार्ग विभागाच्या उमरोली पोलिस चौकीचे पोलीस निरीक्षक वानखेडे यांच्याशी वारंवार संपर्क साधूनही त्यांनी फोन उचलला नाही