वाशी, ता. २५ (बातमीदार) : उच्च न्यायालयाच्या आदेशानुसार नवी मुंबई महापालिका कार्यक्षेत्रातील बांधकाम प्रारंभ प्रमाणपत्र घेतलेल्या; परंतु भोगवटा प्रमाणपत्र प्राप्त न करता वापर सुरू केलेल्या इमारतींची यादी नवी मुंबई महापालिकेचे संकेतस्थळावर, तसेच सर्व आठ विभाग कार्यालयांमध्ये उपलब्ध करून देण्यात आली आहे. नवी मुंबई महापालिकेने जाहीर केलेल्या यादीत सुमारे दोन हजार १११ इमारती तथा सोसायट्यांनी भोगवटा प्रमाणपत्र घेतलेले नाही. त्यामुळे नवी मुंबई महापालिका कार्यक्षेत्रातील बांधकाम प्रारंभ प्रमाणपत्र घेतलेल्या सर्व इमारतींना वापर सुरू करण्यापूर्वी भोगवटा प्रमाणपत्र घेणे बंधनकारक आहे. तरी संबंधितांनी भोगवटा प्रमाणपत्र मिळणेबाबतचा प्रस्ताव नगररचना विभागाकडे सादर करून भोगवटा प्रमाणपत्र घ्यावे. अन्यथा त्याच्या विरोधात महाराष्ट्र प्रादेशिक नियोजन व नगररचना अधिनियम, १९६६च्या तरतुदीनुसार नियमानुसार कार्यवाही करण्यात येईल, असे सहाय्यक नगररचना अधिकारी सोमनाथ केकाण यांनी स्पष्ट केले.