नवीन पनवेल, ता. २५ (बातमीदार) : कामोठे सेक्टर-२१ मधील विस्टा कॉर्नरजवळ नेहमीच वाहनांची वर्दळ असते. त्यामुळे अपघाताची शक्यता आहे. या भागात स्वयंचलित सिग्नल यंत्रणा बसवावी, अशी मागणी महाराष्ट्र पोलिस बॉइज संघटनेचे रायगड जिल्हाध्यक्ष किशोर वाजे यांनी नवी मुंबई वाहतूक विभागाचे पोलिस उपायुक्त तिरुपती काकडे यांच्याकडे निवेदनाद्वारे केली आहे. विस्टा कॉर्नर परिसरात वाहतूक कोंडी होऊ नये यासाठी पोलिस दिवसभर कर्तव्य बजावतात; परंतु वाहतुकीच्या वर्दळीमुळे त्यांच्यावरही ताण येतो. वाहतूक पोलिसांवरील अतिरिक्त ताण कमी करण्यास या स्वयंचलित यंत्रणेमुळे मदतच होईल. गर्दी आणि वाहतूक कोंडी लक्षात घेता अपघात नियंत्रणासाठी स्वयंचलित सिग्नल यंत्रणा बसवावी, असे निवेदनात म्हटले आहे.