वेतन न मिळाल्याने घंटागाडी कर्मचाऱ्यांचा संप
ठाणेकरांच्या दारात कचऱ्याचे ढीग
सकाळ वृत्तसेवा
ठाणे, ता. २५ : पालिका क्षेत्रातील कचऱ्याचा प्रश्न आ वासून उभा आहे. ठेकेदाराने वेतन न दिल्यामुळे घंटागाडी कर्मचाऱ्यांनी संपाचे हत्यार उपसले आहे. मागील चार दिवसांपासून सुरू असलेल्या या संपामुळे माजिवडा-मानपाडा, लोकमान्यनगर, वर्तकनगर, वागळे इस्टेट आणि नौपाडा कोपरी भागातील रहिवाशांच्या दारातील कचरा उचलला गेला नसल्यामुळे कचऱ्याचे ढीग साचल्याचे चित्र आहे.
ठाणे महापलिकेमागील कचरा कोंडीचे ग्रहण सुटता सुटेनासे झाले आहे. सीपी तलाव येथे कचऱ्याचे ढीग वाढू लागल्याने तेथे कचरा टाकण्यास स्थानिकांच्या असलेल्या विरोधाच्या भूमिकेमुळे शहरातील अनेक भागांत ढीग साचू लागले होते. त्यात पालिकेने भिवंडीतील आतकोली येथे कचऱ्याची विल्हेवाट लावण्याची प्रक्रिया हाती घेतली. त्यामुळे काहीशा प्रमाणात कचरा प्रश्न मार्गी लागल्याचे दिसून येत असतानाच पुन्हा एकदा कचरा प्रश्न पेटला असल्याचे दिसून येत आहे. पालिकेच्या एका ठेकेदाराला कचरा उचलण्याचे पाच प्रभाग समित्यांचे काम देण्यात आले आहे. दरम्यान, या ठेकेदाराने मे महिन्याचा पगार न दिल्याने घंटागाडीवर काम करणाऱ्या कर्मचाऱ्यांनी शनिवारपासून (ता. २१) संपाचे हत्यार उपसले होते.

आरोग्याचा प्रश्न उद्भवण्याची शक्यता
कर्मचाऱ्यांच्या संपामुळे माजिवडा-मानपाडा, लोकमान्यनगर, वर्तकनगर, वागळे इस्टेट आणि नौपाडा कोपरी भागातील रहिवाशांच्या दारातील कचरा शनिवारपासून पडून होता. त्यात पावसाळा सुरू असल्याने कचऱ्याची दुर्गंधी पसरून मच्छर व डास यांची उत्पत्ती होण्याचा धोका संभवत आहे. यामुळे आरोग्याचा प्रश्न उद्भवण्याची शक्यता निर्माण झाली आहे. दरम्यान, बुधवारी (ता. २५) अखेर या संपावर तोडगा निघाला आणि कर्मचाऱ्यांचा पगार झाल्याने ते पुन्हा कामावर हजर झाले.