उल्हासनगर, ता. २५ (बातमीदार) : पाण्याचा अंदाज न आल्याने कल्याण पूर्वेतील चिंचपाडा येथे राहणाऱ्या सुशील गवळी या पर्यटकाचा श्री मलंगगड आंभे गावाजवळील बंधाऱ्यात बुडून मृत्यू झाल्याची घटना नुकतीच घडली आहे.
पावसामुळे निर्माण झालेले निसर्गरम्य वातावरण आणि त्यात नदीतील बंधाऱ्यात पाण्यातील आनंद लुटण्यासाठी कल्याण पूर्वेतील सुशील गवळी हा शनिवारी सायंकाळच्या सुमारास श्री मलंगगडच्या नदीपात्रात पोहायला आला होता. मात्र, पाण्याचा अंदाज न आल्याने त्याचा पाण्यात बुडून मृत्यू झाला. श्री मलंगगड भागातील ही या वर्षातील पहिलीच दुर्घटना आहे. बुडालेल्या सुशीलचा मृतदेह पोलिसांनी बाहेर काढून उल्हासनगरच्या शासकीय मध्यवर्ती रुग्णालयात शवविच्छेदनासाठी पाठवले. त्यानंतर त्याचा पार्थिव नातलगांकडे सुपूर्द केला. या दुर्घटनेची अकस्मात मृत्यूची नोंद हिललाइन पोलिस ठाण्यात केली असून, पुढील तपास सुरू आहे.