भिवंडी, ता. २५ (वार्ताहर)ः भिवंडी-वाडा राज्य महामार्गावर शासन कोट्यवधींचा खर्च करूनही निकृष्ट दर्जाचे काम झाल्याने हा महामार्ग मृत्यूचा मार्ग झाला आहे. याविरोधात काँग्रेसच्या वतीने आंदोलन करण्यात आले.
या रस्त्यावर पंधरा वर्षांपासून मोठ्या प्रमाणात निधी खर्च होत असला तरी या रस्त्याची अवस्था अत्यंत दयनीय झाली आहे. याच अनुषंगाने काँग्रेसचे ठाणे जिल्हा ग्रामीण अध्यक्ष दयानंद चोरघे यांच्या नेतृत्वात दुगडफाटा येथे निषेध आंदोलन करण्यात आले. या वेळी रस्त्याच्या झालेल्या अवस्थेला मुख्यमंत्री, जिल्ह्याचे पालकमंत्री, राज्य व केंद्र सरकार जबाबदार असल्याचा आरोप त्यांनी केला. तसेच प्रशासनाने दुरुस्तीचे काम तातडीने केले नाही तर तीव्र आंदोलन करण्याचा इशारा देण्यात आला. या वेळी आंदोलकांनी रस्त्यातील खड्ड्यांमध्ये बेशरम झाडे लावून प्रशासनविरोधात घोषणाबाजी केली. या आंदोलनात काँग्रेसचे शरद ठाकरे, नीलेश भोईर, सोहेल खान, माजी उपसभापती महेश धानके, शहापूर तालुका अध्यक्ष जितेश विशे, कल्पेश पाटील, संदेश वखारे यांच्यासह भिवंडी ग्रामीणमधील काँग्रेस कार्यकर्ते मोठ्या संख्येने उपस्थित होते.