शंभर युनिटपर्यंत वीज वापर स्वस्त
महावितरणचे १ जुलैपासून नवे दर; इतरांना दरवाढीचा झटका

सकाळ वृत्तसेवा
मुंबई, ता. २५ : महावितरणने वीजदर निश्चितीबाबत दाखल केलेल्या पुनर्विचार याचिकेनुसार महाराष्ट्र वीज नियामक आयोगाने आज नवे वीजदर जाहीर केले आहेत. त्यानुसार २०२५-२६ या पहिल्या वर्षासाठी शंभर युनिटपर्यंत वीज वापर असलेल्या घरगुती ग्राहकांना दिलासा मिळाला आहे; तर १०१ युनिटहून अधिक वीज वापर असलेल्या ग्राहकांच्या वीजबिलात १ जूनपासून वाढ होणार आहे. औद्योगिक ग्राहकांच्या दरातही काहीशी वाढ होणार आहे. त्यानंतर पुढील चार वर्षे टप्प्याटप्प्याने वीजदर कमी होणार आहे. वीज आयोगाने जाहीर केलेले २०२५-२६ या आर्थिक वर्षासाठीचे नवे दर १ जुलैपासून लागू होणार आहेत.

बहुवार्षिक वीजदर निश्चितीबरोबरच तीन वर्षांतील अचूक योजनेच्या पार्श्वभूमीवर वीज आयोगाने २८ मार्चला महावितरणचे वीजदर निश्चितीचे आदेश जारी केले होते. त्यानुसार आयोगाने २०२५-२६ या वर्षासाठी १० टक्क्यांची कपात तर २०२९-३०पर्यंत सुमारे १६ टक्क्यांच्या संचयी कपातीस मान्यता दिली होती. त्याला महावितरणने आव्हान देऊन वीज आयोगाकडे पुनर्विचार याचिका दाखल केली होती. त्यानुसार आयोगाने आज वीजदर जाहीर केले असून त्यात पहिल्या वर्षी कमी वीज वापर असलेल्या ग्राहकांना काहीसा दिलासा मिळणार आहे, तर जास्तीचा वीज वापर असणाऱ्यांच्या वीजदरात वाढ होणार आहे. दरम्यान, दारिद्र्यरेषेखालील वीज ग्राहकाला पुरवल्या जाणाऱ्या विजेचा प्रतियुनिटचा दर सध्या १.७४ रुपये एवढा होता, तो आता १.४८ रुपये एवढा होणार असून तो पुढील पाच वर्षांसाठी कायम असणार आहे.
---------
घरगुती ग्राहकांचा वीजदर (प्रतियुनिटचा दर रुपयांत)
वीज वापर (युनिट) - सध्याचा दर - २०२५-२६ - २०२६-२७ - २०२७-२८ - २०२८-२९ - २०२९-३०
०-१०० - ६.३२ - ५.७४ - ५.५६ - ५.४३ - ४.५९ - ४.३४
१०१-३०० - १२.२३ - १२.५७ - १२.४० - १२.२८ - १२.१३ - १२.१५
३०१-५०० - १६.७७ - १६.८५ - १६.६४ - १६.४४ - १२.२९ - १४.६१
५०० पेक्षा जास्त - १८.९३ - १९.१५ - १९.१३ - १९.०१ - १८.३७ - १८.२०
-------------
महावितरण म्हणते, वीजदरात कपात
वीज आयोगाने महावितरणच्या याचिकेनुसार प्रथमच वीजदर कपातीचा आदेश दिला आहे. वीजदर कपातीमुळे घरगुती ग्राहकांना दिलासा मिळतानाच उद्योग-व्यवसायांना चालना मिळणार असल्याचा दावा महावितरणचे व्यवस्थापकीय संचालक लोकेश चंद्र यांनी केला आहे. मुख्यमंत्री देवेंद्र फडणवीस यांनी सर्वसामान्य घरगुती ग्राहकांच्या वीजदरात कपात करण्याचे आश्वासन दिले होते आणि त्याचे पालन झाले आहे. दरवर्षी औद्योगिक व व्यावसायिक वीजदरात दहा टक्के वाढ होत होती. त्याऐवजी आता पुढील पाच वर्षांत या घटकांच्या वीजदरात कपात होणार असल्याचेही त्यांनी म्हटले आहे.