वातानुकूलित लोकलमधील महिलांच्या डब्यात नशेखोर तरुण
सकाळ वृत्तसेवा
डोंबिवली, ता. २७ : मुंबईला जाणाऱ्या वातानुकूलित लोकलमधील महिलांच्या डब्यात नशेत असलेल्या एका तरुणाने प्रवेश केला आणि महिला प्रवाशांत एकच गोंधळ उडाला. याचा व्हिडिओ समाजमाध्यमांतून व्हायरल झाला आहे. लोकल प्रवासातील महिलांच्या सुरक्षेचा प्रश्न ऐरणीवर असतानाच डोंबिवली स्थानकात शुक्रवारी (ता. २७) हा प्रकार घडला आहे.
डोंबिवली स्थानकातून शुक्रवारी सकाळी १०.३४ वाजता सुटणाऱ्या वातानुकूलित लोकलमध्ये हा प्रकार घडला. एका मद्यधुंद तरुणाने थेट महिलांसाठी आरक्षित डब्यात चढून मुंब्रा स्थानकापर्यंत प्रवास केला. या प्रकाराचा व्हिडिओ एका सतर्क महिलेने मोबाईलमध्ये शूट करून समाजमाध्यमांवर व्हायरल केला आहे. यानंतर अनेक महिला प्रवाशांनी रेल्वे प्रशासनाच्या हलगर्जीवर सवाल उपस्थित केला आहे.