अलिबाग, ता. २८ (वार्ताहर) : केंद्र सरकारच्या स्वच्छ भारत मिशन (ग्रामीण)अंतर्गत स्वच्छता सर्वेक्षणाची जोरदार तयारी सुरू झाली आहे. या अनुषंगाने रायगड जिल्ह्यातील ८०९ ग्रामपंचायतींच्या १,८३० गावांमध्ये लवकरच केंद्रस्तरीय समितीमार्फत स्वच्छतेची तपासणी करण्यात येणार आहे.
सर्वेक्षणामध्ये गावपातळीवरील वैयक्तिक व सार्वजनिक शौचालयांचा वापर, दृश्यमान स्वच्छता, ओला व सुका कचरा वर्गीकरण, घनकचरा व सांडपाणी व्यवस्थापन, खत खड्डे, प्लॅस्टिक संकलन व व्यवस्थापन आदींचा सविस्तर आढावा घेण्यात येणार आहे. तपासणीदरम्यान समितीकडून घरोघरी भेटी दिल्या जातील आणि नागरिकांच्या हात धुणे, शौचालयाचा नियमित वापर, कचरा व्यवस्थापनाच्या सवयींचा आढावा घेतला जाईल. यासोबतच शाळा, अंगणवाड्या, बाजारपेठा, धार्मिक स्थळे व सार्वजनिक शौचालयांची स्वच्छताही तपासली जाणार आहे.
जिल्ह्यातील सर्व सरपंच, ग्रामपंचायत सदस्य, ग्रामसेवक, ग्राम पाणीपुरवठा व स्वच्छता समिती सदस्य तसेच ग्रामस्थांनी सर्वेक्षणामध्ये सक्रिय सहभाग नोंदवावा, असे आवाहन मुख्य कार्यकारी अधिकारी नेहा भोसले यांनी केले आहे. स्वच्छतेतून समृद्धीकडे वाटचाल ही संकल्पना लक्षात घेता प्रत्येक ग्रामपंचायतीने गावात दृश्यमान स्वच्छता टिकवण्यावर भर द्यावा, तपासणीसाठी आवश्यक कागदपत्रांची तयारी व सार्वजनिक जागांची नियमित देखभाल करावी, असे आवाहन पाणी व स्वच्छता विभागाच्या उपमुख्य कार्यकारी अधिकारी शुभांगी नाखले यांनी केले आहे.

असे होणार मूल्यांकन :
सर्वेक्षणात गावांचे मूल्यांकन एकूण १,००० गुणांच्या आधारे केले जाणार आहे. यामध्ये घनकचरा व सांडपाणी व्यवस्थापन १२० गुण, ग्रामस्थांचा प्रतिसाद व मानसिकतेत झालेला बदल १०० गुण, स्वच्छता सुविधांचा वापर २४० गुण, गावांची प्रत्यक्ष पाहणी व प्रश्नावली ५४० गुण, मोबाईल अ‍ॅप व घरगुती सर्वेक्षणावर आधारित नागरिक अभिप्राय प्रत्येकी ५० गुण अशा विविध निकषांवर मूल्यमापन होणार आहे.