गांजा विक्रीसाठी आलेल्या दोघांना अटक
ठाणे, ता. २८ : वेगवेगळ्या दोन ठिकाणी अमली पदार्थ विक्रीसाठी आलेल्या दोघांना अटक करण्यात आली. या दोन्‍ही कारवायांत सुमारे तीन किलो गांजा हस्तगत करण्यात आला. अटकेतील दोघेही आरोपी स्थानिक नागरिक असल्याचे पोलिसांकडून सांगण्यात आले. जुने वाघबीळ गाव परिसरात एक जण बुधवारी (ता. २५) रात्री गांजा विक्रीसाठी येणार असल्याची माहिती वागळे परिमंडळ-५च्या पोलिसांना मिळाली होती. त्यानुसार सापळा रचून दादलानी रोड परिसरात राहणाऱ्या आनंद बबन वर्पे (वय ५१) याला ताब्यात घेतले. त्याच्याकडून २० हजार रुपये किमतीचा ९९५ ग्रॅम वजनाचा गांजा जप्त करण्यात आला. याप्रकरणी कासारवडवली पोलिस ठाण्यात गुन्हा दाखल करीत त्याला अटक केली. तर दुसऱ्या घटनेत पोखरण रोड नंबर २, गांधीनगर येथे अमली पदार्थ विक्रीसाठी एक जण येणार असल्याची माहिती चितळसर पोलिसांना मिळाली होती. त्यानुसार शुक्रवारी (ता. २७) सापळा रचून गांजा विक्रीसाठी आलेल्या अनिल श्रीकिशन यादव (वय ३६) याला ताब्यात घेतले. त्याच्याकडून १ किलो ९६६ ग्रॅम वजनाचा गांजा, रोख रक्कम आणि मोबाईल फोन असा १८ हजार ५२० रुपयांचा मुद्देमाल जप्त केला. ही कारवाई वरिष्ठ पोलिस निरीक्षक सुनील वरुडे यांच्या पथकाने केली. याप्रकरणी गुन्हा दाखल झाल्याची माहिती चितळसर मानपाडा पोलिसांनी दिली.
.............