सहावर्षीय मुलीच्या बोटांवर शस्त्रक्रिया
हातापायांच्या जुळलेल्या बोटांची प्लॅस्टिक सर्जरी

ठाणे शहर, ता. २९ (बातमीदार) : ठाणे जिल्हा सामान्य रुग्णालयात एका मुलीवर शस्त्रक्रिया करून डाव्या हातांची जुळलेली दोन बोटे शस्त्रक्रिया करून यशस्वीरित्या वेगळी करण्यात आली. आता उर्वरित हात आणि दोन्ही पायांची बोटे टप्प्याटप्प्याने वेगळी केली जाणार आहेत. तिच्यातील जन्मजात बोटांचे व्यंग दूर होणार असल्याने तिचे पुढील आयुष्य सुखकर होणार आहे.

भिवंडी परिसरात राहणाऱ्या सहावर्षीय मुलीच्या दोन्ही हात व दोन्ही पायांची मधली दोन-दोन बोटे जन्मतःच चिकटलेली आहेत. तिच्यातील या व्यंगामुळे तिला लेखन, खेळ, वस्तू उचलणे यांसारख्या हालचाली करण्यासाठी अडथळा येत आहे, परंतु आता ठाणे जिल्हा सामान्य रुग्णालयाच्या मदतीने त्यांची ही चिंता दूर होणार आहे. अनेक रुग्णालयांत या शस्त्रक्रियेकरिता मोठा खर्च सांगितल्याने त्यांच्या चिंतेत आणखी भर पडली होती, परंतु जिल्हा रुग्णालयात तिला घेऊन गेल्यावर त्यांची चिंता दूर झाली आहे. मुलीच्या बोटांची तपासणी केल्यानंतर जिल्हा शल्यचिकित्सक डॉ. कैलास पवार, अतिरिक्त जिल्हा शल्यचिकित्सक डॉ. धीरज महांगडे, यांच्या मार्गदर्शनाखाली मुलीच्या डाव्या हातावर नुकतीच शस्त्रक्रिया करण्यात आली. हाताच्या जुळलेल्या दोन्ही मधल्या बोटांवर शस्त्रक्रिया केल्याची माहिती प्लॅस्टिक सर्जन डॉ. अभिषेक धाकड यांनी दिली.

तासाभराच्या शस्त्रक्रियेनंतर तिचे मधले व बाजूची चिकटलेली बोटे वेगळी केली. यामुळे आता तिला बोटांची हालचाल करता येऊ लागली आहे. पुढील काळात योग्य फिजिओथेरपी आणि काळजी घेतल्यास ती बोटे पूर्णतः कार्यक्षम होतील. या शस्त्रक्रियेसाठी वरिष्ठ सर्जन डॉ. निशिकांत रोकडे, प्लॅस्टिक सर्जन डॉ. अभिषेक धाकड, भूलतज्ज्ञ डॉ. प्रियांका महांगडे, प्रीती पगारे, भक्ती प्रिठे यांनी परिश्रम घेतले.

अशा प्रकारच्या प्लॅस्टिक सर्जरीसाठी खासगी रुग्णालयांमध्ये मोठा खर्च येतो. त्यामुळे अनेक गरीब व मध्यमवर्गीय कुटुंबे अशा उपचारांपासून वंचित राहतात, पण त्यांनी जिल्हा रुग्णालयांत अशा जटिल व खर्चिक सर्जरीचा मोफत लाभ घ्यायला पाहिजे.
डॉ. कैलास पवार, जिल्हा शल्यचिकित्सक, ठाणे

रुग्णाच्या पायांवरही अशाच प्रकारची बोटे चिकटलेली आहेत. पहिल्या टप्प्यात डाव्या हाताची यशस्वी शस्त्रक्रिया झाल्यानंतर उर्वरित बोटांवर पुढील टप्प्यांमध्ये उपचार केले जाणार आहेत. मुलीच्या पालकांनी वैद्यकीय पथकाचे आभार मानले आहेत.
डॉ. अभिषेक धाकड, प्लॅस्टिक सर्जन, जिल्हा रुग्णालय

कोट फोटो : डॉक्टर कैलास पवार (पांढरी दाढीवाले )
कोट फोटो : अभिषेक धाकड ( टोपीवाले)