वृत्तपत्र विक्रेत्‍यांवरील कारवाईचा विरोध
मालाड, ता. २९ (बातमीदार) ः गोरेगाव पूर्वेतील पांडुरंगवाडी येथील वर्तमान विक्रेते राजू पेदाहन्ति यांच्या स्टॉलवर शुक्रवारी (ता. २७) पालिका पी दक्षिण विभागाच्या वतीने कारवाई करण्यात आली. राजू हे मागील अनेक वर्षांपासून या ठिकाणी स्टॉलवर वृत्तपत्रविक्रीचा व्यवसाय करत आहेत. वृत्तपत्रविक्रीतून मिळणाऱ्या उत्‍पन्नातून त्यांची उपजीविका चालते. या कारवाईमुळे संतप्त झालेल्‍या वृत्तपत्र विक्रेत्‍यांनी पालिका पी दक्षिण विभागात जाऊन संबंधित अधिकाऱ्यांशी भेट घेत वस्तुस्थिती त्यांच्या समक्ष मांडली. याबाबत अधिकाऱ्यांनीही सकारात्मक प्रतिसाद देत वरिष्ठ अधिकाऱ्यांशी चर्चा करून हा विषय सामंजस्याने सोडवण्याचा प्रयत्न करणार असल्याचे आश्‍वासन दिले आहे. वृत्तपत्र विक्रेत्‍यांच्या शिष्‍टमंडळात संघर्ष समितीचे सुनील दुबे, गोरेगाव वृत्तपत्र विक्रेता संघाचे अध्यक्ष संजय सामंत, संजू माने, अध्यक्ष विलास माने, महेश जाधव, सचिन गवस, गोकुळधाममधून पाशु पठान, इंद्रप्रकाश सिंग उपस्‍थित होते.
विक्रेते ऊन, वारा, पाऊस, सणवार, घरी घडलेली वाईट घटना या सर्वांवर मात करून सर्वांपर्यंत वर्तमानपत्र पोहोचवण्याचे काम करतात. त्‍यामुळे अशी कारवाई करू नये, अशी मागणी संघर्ष समिती आणि गोरेगाव गोकुळ धाम वृत्तपत्र विक्रेता संघाने केली आहे.