आझाद मैदानावर छप्पर टाकण्याची मागणी
मालाड, ता. ३० (बातमीदार) : आझाद मैदानात आंदोलन करणाऱ्या नागरिकांचे पावसाळ्यात आणि उन्हाळ्यात हाल होत असून, त्यामुळे या ठिकाणी कायमस्वरूपी छप्पर बांधावे, अशी मागणी जनता दल सेक्युलर पक्ष आणि मूलभूत अधिकार संघर्ष समितीने केली आहे. याबाबतचे पत्र मुख्यमंत्री देवेंद्र फडणवीस, उपमुख्यमंत्री अजित पवार, एकनाथ शिंदे यांच्याकडे केली आहे. आझाद मैदानामध्ये आंदोलन, उपोषण केल्‍याने न्याय मिळेल, या आशेने राज्‍यभरातील नागरिक इथे येतात. उघड्यावर, पावसात भिजत वा तळपत्या उन्हात त्‍यांना आंदोलन करावे लागते. त्‍यामुळे सरकारने कायमस्वरूपी छप्पर उभारावे, अशी मागणी जनता दलाचे मुंबई अध्यक्ष प्रभाकर नारकर, प्रदेश संघटन सचिव संजय परब, मुंबईचे कार्याध्यक्ष सलीम भाटी, महासचिव प्रशांत गायकवाड, जिल्हाध्यक्ष संजीवकुमार सदानंद, मूलभूत अधिकार संघर्ष समितीचे दिनेश राणे, संग्राम पेटकर यांनी केली आहे.