ठाकुर्ली उड्डाणपुलाजवळ खड्डे
खड्ड्यांमुळे वाहनचालक हैराण

सकाळ वृत्तसेवा
डोंबिवली, ता. ३० : ठाकुर्ली उड्डाणपुलाच्या पोहोच रस्त्यावर स. वा. जोशी शाळेजवळ रस्त्यांवर खड्डे पडले आहेत. या खड्ड्यांमुळे वाहनचालकांना कसरत करावी लागते. या ठिकाणी पालिकेच्या जलवाहिनीचा व्हॉल्व असल्याने त्या ठिकाणी सातत्याने रस्ता खचतो. यामुळे मोठ्या प्रमाणात खड्डे पडून वाहतुकीला अडथळा निर्माण होत आहे. या खड्ड्यांजवळ एक रस्तारोधक उभा केला असून, तोदेखील वाहतुकीच्या आड येत आहे.

डोंबिवली पूर्व व पश्चिमेला जोडणाऱ्या ठाकुर्ली उड्डाणपुलाच्या पूर्व भागात स. वा. जोशी शाळा येथे पोहोच रस्त्यावर मागील दोन आठवड्यांपासून खड्डे पडले आहेत. पाऊस सुरू असल्याने या खड्ड्यांत पाणी साचत असून, वाहनचालकांना नाहक त्रास सहन करावा लागत आहे. ठाकुर्ली पूर्व उड्डाणपूल भागात डोंबिवली पूर्व रेल्वे स्थानकाकडून येणारी, व्ही. पी. रस्ता, ठाकुर्ली चोळेगावातून येणारा रस्ता, ९० फुटी रस्ता भागातून वाहने येतात. डोंबिवली पश्चिमेतील वाहने याच तिन्ही रस्त्यांवरून धावतात. खड्ड्यांमुळे वाहनचालक संथगतीने वाहन चालवतात. परिणामी या भागात कोंडी होते. हे खड्डे भरण्याची सूचना वाहतूक विभागाने पालिकेला केली आहे.

शाळेच्या बस या रस्त्यावरून धावतात. त्यांना या खड्ड्यांचा फटका बसतो. ठाकुर्ली चोळे भागातून कल्याण दिशेकडून येणारी वाहने ठाकुर्ली पुलावर जाण्यासाठी वळण घेतात. त्या वेळीही वाहनचालकांना कसरत करावी लागते. मोठी वाहने या ठिकाणी खड्ड्यांमुळे तत्काळ वळण घेत नाहीत. त्यामुळे या वाहनांच्या पाठीमागे इतर वाहनांच्या रांगा लागतात. प्रभागांमध्ये रस्त्यांप्रमाणे खड्डे भरण्यासाठी एजन्सी नियुक्ती केली आहे. खड्डे तत्काळ भरण्याच्या सूचना ठेकेदारांना केल्या आहेत. ठाकुर्ली येथील खड्डे भरण्याच्या सूचना ठेकेदाराला केल्या आहेत.