बालमित्र कार्यशाळा उत्‍साहात
मालाड, ता. ३० (बातमीदार) ः युवा संस्थेच्या वतीने ‘मुलांचे संरक्षण आणि बालमित्र म्हणून आपली जबाबदारी’ या विषयावर दोनदिवसीय कार्यशाळा युवा सेंटर येथे यशस्वीरीत्या पार पडली. या कार्यशाळेमध्ये मालवणी, कांदिवली, मानखुर्द आणि वांद्रे येथील युवक, महिला व अंगणवाडी सेविका सहभागी झाल्‍या होत्‍या. या कार्यशाळेचा मुख्य उद्देश समाजातील सर्व घटकांनी बाल संरक्षणाबाबत सजग, जागृत होऊन बाल हक्कांचे उल्लंघन टाळण्यासाठी स्थानिक पातळीवर सक्रिय भूमिका घेणे हा होता. मुलांचे संरक्षण ही आपली सर्वांची सामूहिक जबाबदारी आहे, असे युवा संस्था, बाल अधिकार समन्वयक प्रकाश भवरे, बाल अधिकार कार्यकर्ता जरीन अन्सारी यांनी सांगितले.