मालमत्ता ऑनलाइन प्रणाली कोमात
मालमत्ता संकेतस्थळावर नोंदणीच नाही
सकाळ वृत्तसेवा
ठाणे, ता. १ : जिल्हा परिषदेच्या ज्या कोट्यवधी रुपयांच्या जागांवर अतिक्रमण झाले आहे, त्या ताब्यात घेण्यासाठी जिल्हा परिषद प्रशासनाने मालमत्तांचे सर्वेक्षण करून ऑनलाइन नोंदणी प्रणाली तयार केली आहे. या मालमत्तांची ऑनलाइन नोंद केल्यानंतर आता प्रत्येक मालमत्तेची माहिती एका क्लिकवर मिळणार आहे, असा दावा जिल्हा परिषद प्रशासनाने केला आहे. ही प्रणाली सुरू करून आठ दिवसांचा कालावधी लोटला आहे; मात्र अद्यापही मालमत्तांची नोंदच या प्रणालीवर झालेली नाही.

जिल्हा परिषदेच्या माध्यमातून ग्रामीण भागातील जनतेला सोयीसुविधा पुरवण्याबरोबरच त्यांच्या आरोग्याची काळजी घेण्याचे कामदेखील करण्यात येत असते. अशातच जिल्हा परिषदेच्या मालकीच्या शहर व तालुक्यांच्या ठिकाणी तसेच ग्रामीण भागात मोठ्या प्रमाणावर जागा, मालमत्ता आहेत. या जागा अथवा मालमत्तांवर अनेक ठिकणी अतिक्रमण केल्यामुळे आणि संबंधित मालमत्तांची कागदपत्रेच सापडत नसल्यामुळे प्रशासनाची अडचण होत असते. या जागांवर अतिक्रमण झाल्यामुळे त्याचा परिणाम जिल्हा परिषदेच्या महसुलावर होत आहे. याची दखल घेत ठाणे जिल्हा परिषदेचे मुख्य कार्यकारी अधिकारी रोहन घुगे यांनी आधुनिकतेची कास धरत, मालमत्तांचे सर्वेक्षण करून त्यांची ऑनलाइन नोंद प्रणाली तयार केली. त्या प्रणालीचे ग्रामविकास मंत्री जयकुमार गोरे यांच्या हस्ते अनावरणदेखील करण्यात आले.

आतापर्यंत नऊ हजार ४४७ मालमत्तांचा शोध घेण्यात आले आहे. या उपक्रमामुळे ग्रामस्थ, ग्रामपंचायती आणि प्रशासनात समन्वय व पारदर्शक कार्यपद्धती निर्माण होईल. ही डिजिटल प्रणाली केवळ मालमत्ता नोंदीसाठीच नव्हे, तर मालमत्तेचे संरक्षण, नियोजन, सुविधा उपलब्धता, देखभाल आणि उत्पन्नवाढीसाठी अत्यंत प्रभावी ठरणार असल्याचा विश्वास मुख्यकार्यकारी अधिकारी रोहन घुगे यांनी व्यक्त केला होता; मात्र ही ऑनलाइन प्रणाली सुरू करून आठ दिवसांचा कालावधी लोटला आहे. असे असतानाही मालमत्ता नोंद प्रणालीवर मालमत्तांची नोंद झाली नसल्याची बाब समोर आली आहे.

संकेतस्थळावर नोंदणी
जिल्हा परिषदअंतर्गत ग्रामपंचायत मालमत्तांचे सर्वेक्षण, नोंदणी व संगणकीकरणाच्या उपक्रमांतर्गत जिल्ह्यातील जिल्हा परिषद, पंचायत समिती आणि ग्रामपंचायतींच्या स्थावर व जंगम मालमत्तांची नऊ हजार ४७७ नोंदी ऑनलाइन प्रणालीमध्ये अद्ययावत करण्यात येणार आहेत. या मालमत्तांचे सर्वेक्षण करून ऑनलाइन मालमत्ता नोंद प्रणाली https://zpthanemalmattakosh.com तयार करण्यात आली आहे.

जिल्हा परिषद, पंचायत समिती आणि ग्रामपंचायतींच्या स्थावर व जंगम मालमत्तांची नऊ हजार ४७७ नोंदी ऑनलाइन प्रणालीमध्ये अद्ययावत करण्यात येणार आहेत. यासाठीचे आवश्यक प्रशिक्षण अधिकारी व कर्मचाऱ्यांना लवकरच देण्यात येणार आहे. प्रशिक्षण पूर्ण झाल्यानंतर मालमत्तांची प्रत्यक्ष पाहणी करून त्यांचे फोटो व त्यांचे लोकेशन यांची माहिती संकेतस्थळावर उपलब्ध होणार आहे.
- प्रमोद काळे, उपमुख्यकार्यकारी अधिकारी, ग्रामपंचायत, जि. प. ठाणे.