जलशुद्धी केंद्राची संरक्षक भिंत कोसळली
उल्हासनगर, ता. २ (वार्ताहर) : म्हारळ गावात असलेल्या एमआयडीसी जलशुद्धीकरण केंद्राची संरक्षक भिंत कोसळल्याची घटना सोमवारी (ता. ३०) घडली आहे. धोबीघाटकडे जाणाऱ्या मुख्य नाल्यात ही भिंत कोसळल्यामुळे परिसरात मोठा आवाज झाला. त्यामुळे नागरिकांमध्ये भीतीचे वातावरण पसरले आहे. ही संरक्षक भिंत खेमानीपासून धोबीघाटकडे जाणाऱ्या नाल्याच्या बाजूला होती. भिंत कोसळल्याचा आवाज इतका प्रचंड होता की आजूबाजूच्या परिसरात लोकांची एकच धांदल उडाली. घटनेनंतर काही मिनिटांतच घटनास्थळी नागरिकांची गर्दी झाली. तातडीने प्रशासनाला याची माहिती देण्यात आली. अग्निशमन दल आणि आपत्कालीन विभागाचे कर्मचारी तत्काळ घटनास्थळी दाखल झाले असून, ते मलबा हटवण्याचे व सुरक्षेची पाहणी करण्याचे काम करत आहेत. याप्रकरणी अधिक तपास सुरू असून, प्रशासनाने तातडीने सुरक्षा उपाययोजना हाती घेण्याचे संकेत दिले आहेत.