वाशी, ता. २ (बातमीदार) : नवी मुंबई महापालिकेच्या सेवेतून सेवानिवृत्त होणाऱ्या १२ अधिकारी, कर्मचारी यांचा महापालिका मुख्यालयातील ज्ञानकेंद्रात सेवानिवृत्तीनिमित्त सन्मान करण्यात आला. महापालिका सचिव चित्रा बाविस्कर व अतिक्रमण विभागाचे उपआयुक्त डॉ. कैलास गायकवाड यांच्या हस्ते सर्वांचा सन्मान करण्यात आला. या वेळी अधिकारी, कर्मचारी, तसेच सेवानिवृत्त कर्मचाऱ्यांचे कुटुंबीय उपस्थित होते.
नवी मुंबई महापालिका सेवेतून जून महिन्यात निवृत्त होणारे भांडार विभागाचे उपायुक्त शंकर खाडे, वसुली अधिकारी कुंदा तरे, लेखा अधिकारी गीता पालव, मुख्याध्यापक मीनाक्षी पुरकर, प्राथमिक शिक्षिका सुरेखा सुरवसे, स्टाफ नर्स अनुजा देशमुख, वरिष्ठ लिपिक/कर निरीक्षक गणेश पाटील, वाहनचालक प्रकाश भोईर, मीटर वाचक अनिल पाटील, कक्षसेविका मालन पवार, सफाई कामगार बाळू शिरसाट व भगवान सुरडकर अशा १२ अधिकारी, कर्मचारी व शिक्षक यांचा मान्यवरांच्या हस्ते सन्मान करण्यात आला. याप्रसंगी महापालिका सचिव चित्रा बाविस्कर यांनी जीवनाचे सार सांगणारी कविता सादर केली. उपायुक्त डॉ. कैलास गायकवाड यांनी सेवानिवृत्तीप्रसंगी अधिकारी, कर्मचारी यांच्या मनात आनंद आणि हुरहूर अशी संमिश्र भावना असते, असे सांगत नोकरीमध्ये असताना राहून गेलेला छंद जोपासा, कुटुंबासाठी वेळ द्या, असे सांगितले.