पनवेल, ता. ३ (बातमीदार) : आयुक्त मंगेश चितळे यांच्या निर्देशानुसार पनवेल महापालिकेच्या पशुवैद्यकीय विभागामार्फत पनवेल येथील १०० वर्षे जुन्या पांजरपोळ येथे जंतनिर्मूलन व आरोग्य तपासणी शिबिराचे आयोजन करण्यात आले. या शिबिरात एकूण ७९ गायवर्गीय प्राण्यांचे जंतनिर्मूलन करण्यात आले. या शिबिरात गायींच्या जंतनिर्मूलनासोबतच आरोग्य तपासणी, उपचार, तसेच ३० गायींची गर्भतपासणी व वंध्यत्व तपासणीदेखील करण्यात आली. या वेळी गाभण, वंध्यत्वाने त्रस्त आणि दुर्बल गायींकरिता क्षार मिश्रण व कॅल्शियम टॉनिकचे मोफत वाटप करण्यात आले. उपायुक्त डॉ. वैभव विधाते व मुख्य वैद्यकीय अधिकारी डॉ. आनंद गोसावी यांच्या सूचनेप्रमाणे घेण्यात आलेल्या या शिबिरासाठी पशुवैद्यकीय विभागातील तज्ज्ञ अधिकारी डॉ. भगवान गिते, डॉ. मधुलिका लाड, पांजरपोळचे उपाध्यक्ष नितीन मुनोत, डॉ. लाजरी पावसकर, डॉ. राधिका आव्हाड, तसेच पशुसंवर्धन विभागाचे डॉ. समीर तोडणकर, डॉ. मुकेश मर्चंडे, डॉ. आनंद मारकवार आणि इतर कर्मचारी उपस्थित होते.