पदपथाने घेतला मोकळा श्वास
कल्याण, ता. ३ (बातमीदार) : महापालिकेच्या ‘६-फ’ प्रभाग क्षेत्रांतर्गत डोंबिवलीतील फडके रोडवर नुकताच कारवाईचा बडगा उगारण्यात आला होता. फेरीवाले व दुकानदारांनी रस्त्यालगत टाकलेल्या लोखंडी जाळ्या तसेच अतिक्रमण केलेल्या दुकानांवर कारवाई करून पदपथावरील बोर्ड व इतर साहित्य या वेळी ताब्यात घेतले. महापालिकेच्या या कारवाईनंतर पदपथ पादचाऱ्यांना चालण्यासाठी मोकळा केला आहे. मागील काही वर्षांपासून शहरात अनधिकृत फेरीवाल्यांच्या संख्येत आणि कार्यक्षेत्रात झपाट्याने वाढ होत असल्याचे निष्पन्न होत आहे. लोकसंख्येनुसार नवनवीन भागात फेरीवाल्यांची बस्ताने बसू लागली आहेत. त्यानुसार हे फेरीवाले रस्ते, पदपथ, मोकळ्या जागांवर अतिक्रमण करून आपला व्यवसाय थाटतात. परिणामी याच गोष्टीचा करदात्या नागरिकांना त्रास सहन करावा लागतो; मात्र अलीकडल्या काळात महापालिकेने अशी अतिक्रमणे हटविण्याचे काम सुरू ठेवले आहे.