धामणी धरणाचे तीन दरवाजे उघडले
नदीकाठच्या गावांना सतर्कतेचा इशारा

कासा, ता. ४ (बातमीदार) : पालघर जिल्ह्यातील सूर्या प्रकल्पांतर्गत धामणी धरणातील पाण्याची पातळी वाढल्यामुळे धरण प्रशासनाने शुक्रवारी (ता. ४) सायंकाळी ६ वाजता धरणाचे तीन दरवाजे उघडले. ४ जुलै रोजी सकाळी ७ वाजता धामणी धरणातील पाण्याची पातळी शुक्रवारी सकाळी ७ वाजण्याच्या सुमारास ११४.०० मीटर इतकी नोंदविण्यात आली असून, जलसाठा २१४.९१९ दलघमी (दशलक्ष घन मीटर) म्हणजेच सुमारे ७७.७७ टक्के इतका आहे. सध्याच्या पावसाळी परिस्थितीनुसार, पाण्याची पातळी ११४.६० मीटरपर्यंत वाढण्याचा अंदाज वर्तवण्यात आला आहे. याचदरम्यान पाण्याची पातळी ११३.६० मीटरवर स्थिर ठेवण्यासाठी शुक्रवारी सायंकाळी ६ वाजण्याच्या सुमारास धरण प्रशासनाने धरणाचे तीन वक्राकार दरवाजे १, ३ व ५ हे प्रत्येकी ०.४० मीटर उंचीपर्यंत उघडले. यामुळे सुमारे ३,२८५ क्युसेक पाणी नदीत सोडले जात आहे. सोबतच विद्युतगृहातून ६५० क्युसेक पाणी विसर्ग केले जाणार असून, एकूण पाणी विसर्ग ३,९३५ क्युसेकपर्यंत होणार आहे. परिणामी सूर्या नदीच्या पाण्याची पातळी लक्षणीय वाढणार आहे. अतिवृष्टीमुळे धरण प्रशासन सावध असून, पावसाच्या तीव्रतेनुसार विसर्गाचे प्रमाण कमी किंवा अधिक करण्यात येईल, असे अधिकाऱ्यांनी स्पष्ट केले आहे. त्यामुळे सूर्या नदीकाठच्या गावांतील नागरिकांनी विशेष सतर्कता बाळगावी, असे आवाहन करण्यात आले आहे. पाणी विसर्गादरम्यान नदीकाठच्या लोकांनी आवश्यक खबरदारी घ्यावी, नदीकाठी जाणे टाळावे आणि आपत्कालीन परिस्थितीत स्थानिक प्रशासनाशी संपर्क साधावा, असे आवाहन करण्यात आले आहे.