दाखल्याअभावी विद्यार्थ्यांची परवड
शिवसेनेचे वसई तालुकाप्रमुख प्रथमेश राऊत यांचे प्रांत अधिकाऱ्यांना निवेदन
विरार, ता. ६ (बातमीदार) ः वसई उपविभागीय अधिकारी कार्यालयाकडून शेषवंशी क्षत्रिय भंडारी समाजातील विद्यार्थ्यांना जातीचा ओबीसी दाखला नाकारला जात असल्याची बाब शिवसेनेचे वसई तालुकाप्रमुख प्रथमेश राऊत यांनी उपविभागीय अधिकारी शेखर घाडगे यांच्या निदर्शनास आणली आहे. या प्रवर्गातील विद्यार्थ्यांची दाखल्याअभावी परवड होत असून उपविभागीय अधिकारी कार्यालयाने शेषवंशी क्षत्रिय भंडारी समाजाच्या विद्यार्थ्यांना ओबीसी दाखले विनाविलंब द्यावेत, अशी मागणी राऊत यांनी केली आहे.
शेषवंशी क्षत्रिय भंडारी समाज हा वसईतील स्थानिक भूमिपुत्रांचा समाज आहे. वसईमध्ये गेले कित्येक वर्षे शाळा सोडल्याच्या दाखल्यावर शेषवंशी क्षत्रिय भंडारी असाच उल्लेख केला आहे. त्यामुळे उपविभागीय कार्यालयातून हिंदू भंडारी उल्लेख असल्याचा पुरावा हा सातत्याने विद्यार्थ्यांकडे मागितला जात आहे. यामुळे हिंदू भंडारी हा उल्लेख असलेल्या कागदपत्रांची सक्ती करण्यात येऊ नये. शेषवंशी क्षत्रिय भंडारी समाजातील विद्यार्थ्यांचे दाखले नाकारल्याने त्यांना शैक्षणिक कामांमध्ये अनेक अडचणी येत आहेत. हिंदू भंडारी उल्लेख असलेल्या कागदपत्रांची सक्ती करू नये. तर शेषवंशी क्षत्रिय भंडारी उल्लेख असलेले कागदपत्रे स्वीकारून विद्यार्थ्यांना दाखले द्यावेत, अन्यथा आंदोलन करण्याचा इशारा राऊत यांनी दिला आहे.