बालविवाह कायद्याने गुन्हा
चणेरा विद्यालयात मपोह नीलिशा पेढवी यांचे मार्गदर्शन
रोहा, ता. ५ (बातमीदार) ः मुलींनो बालविवाह करू नका. तो कायद्याने गुन्हा आहे. बालविवाह केल्याने संबंधित मुलगा आणि मुलगी यांच्यासहित दोघांच्या पालकांविरोधात गुन्हा दाखल होते, असे सांगत विद्यार्थ्यांनी अभ्यास आणि उज्ज्वल भविष्याकडे लक्ष द्या. उच्च दर्जाचे शिक्षण घेऊन आपल्या आई-वडिलांचे नाव उज्ज्वल करा, असे मौलिक मार्गदर्शन रोहा पोलिस ठाण्याच्या महिला पोलिस हवालदार नीलिशा पेढवी यांनी केले. या शिबिराला विद्यार्थी-विद्यार्थिनी मोठ्या संख्येने उपस्थित होते.
रोहा पोलिस निरीक्षक मारुती पाटील यांच्या मार्गदर्शनाखाली चणेरा भागातील न्यू इंग्लिश स्कूल विद्यालयात मार्गदर्शन व जनजागृती शिबिराचे आयोजन केले होते. कार्यक्रमाच्या अध्यक्षस्थानी डॉ. सी. डी. देशमुख कॉलेजचे प्राचार्य डॉ. अतुल साळुंखे म्हणून उपस्थित होते.
या वेळी उपस्थित मान्यवरांनी विविध विषयांवर मार्गदर्शन केले. यात प्रामुख्याने प्रा. डॉ. अतुल साळुंखे यांनी बालकांचे लैंगिक शोषण, व्यसनाधीनता, बाल गुन्हेगारी या विषयांवर मार्गदर्शन केले. मेहेंदळे हायस्कूलच्या सहाय्यक शिक्षिका सुनंदा पाटील यांनी मोबाईल व समाजमाध्यमांचा अतिवापर, चणेरा बीटचे पो. ह. नरेश मोरे यांनी ऑनलाइन फसवणूक, पो. ह. सुनील सकपाळ यांनी तरुण पिढीला जडलेले व्यसन, महिला पोलिस हवालदार नीलिशा पेढवी यांनी पोक्सो कायदा, बालविवाह, तरुणी व महिलांवरील अत्याचार, तर डॉ. फरिद चिमावकर यांनी आरोग्य व आहार तसेच नवखार गावाच्या पोलिस पाटील आशा बठारे व सुनील कासार यांनी मुला-मुलींचे लैंगिक शोषण याविषयी मार्गदर्शन केले.
या वेळी मुख्याध्यापक के. बी. पाटील, पो. ह. भास्कर शिद, डॉ. फरिद चिमावकर, न्यू इंग्लिश स्कूल व्यवस्थापन समितीचे अध्यक्ष प्रमोद जाधव, विभागातील सर्व पोलिस पाटील सर्व शिक्षक आणि पालक संघ समिती सदस्य उपस्थित होते.

फोटो कॅप्शन : शिबिरात नीलिशा पेढवी यांनी विद्यार्थ्यांना मार्गदर्शन केले.