महापालिकेचा व्यावसायिकांना दणका
प्लॅस्टिक पिशव्या वापरणाऱ्यांविरोधात विविध ठिकाणी दंडात्मक कारवाई
वाशी, ता. ५ (बातमीदार) ः नवी मुंबई महापालिकेच्या वतीने ‘सफाई अपनाओ, बीमारी भगाओ’ अभियानाच्या अनुषंगाने बुधवारी (ता. २) रोजी प्लॅस्टिक पिशव्या तसेच एकल वापर प्लॅस्टिकविरोधात विविध ठिकाणी कारवाई करण्यात आली. त्यामध्ये आठ व्यावसायिकांकडून ४० हजार इतकी दंडात्मक रक्कम वसूल करण्यात आली. तसेच आठ किलो ५०० ग्रॅम इतके एकल वापर प्लॅस्टिक जप्त करण्यात आले.
यात बेलापूर विभाग कार्यालय क्षेत्रात पाच दुकानदारांकडून २५ हजार दंडात्मक रक्कम वसुली तसेच चार किलो प्रतिबंधात्मक प्लॅस्टिक जप्त करण्यात आले. नेरूळ विभागातील दोन दुकानदारांकडे प्लॅस्टिक पिशव्यांचा वापर आढळल्याने प्रत्येकी पाच हजारांप्रमाणे १० हजार रकमेची दंडात्मक वसुली आणि दीड किलो प्लॅस्टिक जप्त तसेच वाशी विभागातील एका व्यावसायिकाकडून पाच हजार दंडात्मक रक्कम वसूल करून आढळलेला तीन किलो पिशव्यांचा साठा जप्त केलेला आहे. त्याचप्रमाणे मागील जून महिन्यातही आठ विभाग कार्यालयांच्या आणि दोन परिमंडळाच्या भरारी पथकांना तपासणीमध्ये ४४ व्यावसायिकांकडे प्लॅस्टिक पिशव्या तसेच एकल वापर प्लॅस्टिक आढळल्याने दोन लाख २५ हजार इतकी दंडात्मक रक्कम वसूल केली असून, २५२ किलो ५५० ग्रॅम प्रतिबंधात्मक प्लॅस्टिक जप्त करण्यात आलेले आहे.

प्लॅस्टिकमुळे स्वच्छतेला बाधा पोहोचत असून, पर्यावरणाचीही हानी होते, हे लक्षात घेत ‘सफाई अपनाओ, बीमारी भगाओ’ अभियानांतर्गत प्लॅस्टिक प्रतिबंधात्मक जनजागृती आणि मोहिमांवर भर दिला जात असून, सुजाण नवी मुंबईकर नागरिकांनी प्लॅस्टिकमुळे पर्यावरणाची होणारी अपरिमीत हानी लक्षात घेऊन एकल वापर प्लॅस्टिकला आपल्या वापरातून हद्दपार करावे.
- डॉ. कैलास शिंदे, आयुक्त नमुंमपा