मुंबईतील कबुतरखाने बंद होणार
पालिकेकडून टप्प्याटप्प्याने होणार कारवाई
सकाळ वृत्तसेवा
मुंबई, ता. ५ : दादर पश्चिम येथील कबुतरखान्यामुळे वाढत असलेले श्वसनविकार, दुर्गंधी आणि प्रदूषण याची सरकारने गंभीर दखल घेतली आहे. त्यासंदर्भात पालिकेला कारवाईचे आदेश देण्यात आले आहेत. मुंबई महापालिकेच्या हद्दीत ५१ कबुतरखाने आहेत. ते बंद करण्याची कारवाई पालिकेकडून टप्प्याटप्प्याने करण्यात येणार असल्याचे पालिकेच्या सूत्रांनी सांगितले.
मुंबईतील कबुतरखान्यांबाबत तातडीने विशेष अभियान राबविण्यात येणार आहे. त्याबाबत राज्य सरकारने महापालिकेला आदेश दिले आहेत. पालिकेच्या दादर येथील जी-उत्तर विभागाने दादर कबुतरखान्यात अतिक्रमण हटाव मोहीम हाती घेतली. या मोहिमेत कबुतरखान्यात साठवलेल्या धान्याच्या गोणी हटविण्यात आल्या व त्या जप्त केल्या. तसेच स्थानिकांनी बांधलेले शेड हटविले. कबुतरखान्याभोवती बांधलेल्या अनधिकृत कुंपणाचा काही भाग हटविण्यात आल्याची माहितीही पालिकेने दिली.

जनजागृती मोहीम आवश्यक
मुंबई महापालिकेच्या हद्दीत ५१ कबुतरखाने आहेत. काही कबुतरखाने न्यायालयाच्या आदेशानुसार बंद करण्यात आले होते, पण हे कबुतरखाने पुन्हा सुरू झाल्याचे निदर्शनास आले आहे. त्यामुळे नागरिकांना होणारा त्रास लक्षात घेऊन कबुतरांना धान्य टाकणे थांबवावे यासाठी जनजागृती आवश्यक आहे. त्यासाठी महापालिकेला एका महिन्यात कबुतरखाने बंद करण्यासाठी विशेष अभियान राबवण्याचे आणि जनजागृती मोहीम सुरू करण्याचे निर्देश लवकरच दिले आहेत.
-------------