विद्यानिकेतन शाळेचा बॅनर पुन्हा चर्चेत
सकाळ वृत्तसेवा
डोंबिवली, ता. ६ : लोकल गर्दीचे बळी, वाहतूक कोंडी, रस्त्यावरील खड्डे, फेरीवाल्यांनी व्यापलेले फुटपाथ, रिक्षाचालकांची मनमानी आदी अनेक समस्यांनी डोंबिवली शहराला विळखा घातला आहे. या सर्व समस्यांमुळे प्रशासकीय यंत्रणादेखील हतबल असल्याचे चित्र शहरात आहे. अशा परिस्थितीत ‘सांग सांग भोलेनाथ, डोंबिवली सुधारेल का?’ असा प्रश्न डोंबिवलीकर भोलानाथला करीत आहेत. अशा आशयाचे बॅनर डोंबिवलीतील विद्यानिकेतन शाळा संस्थेने आपल्या शाळेच्या बसवर लावले आहेत. यामुळे पुन्हा एकदा शाळेचा बॅनर चर्चेचा विषय ठरला आहे.

कल्याण ग्रामीण भागातील विद्यानिकेतन शाळा संस्थेने गेल्या आठवड्यात हिंदीसक्ती विषयावरून ‘माय मरो, मावशी जगो’ असे उपरोधिक फलक शाळेच्या बसवर लावले होते. आता डोंबिवली शहरातील नागरी समस्या, रोजचीच वाहतूक कोंडी, अरुंद रस्ते, खड्डे, फेरीवाले, लोकल गर्दी, त्यामुळे होणारे मृत्यू, रिक्षाचालकांची मनमानी आणि या सगळ्या विषयांवर हातावर घडी तोंडावर बोट ठेवून बसणाऱ्या डोंबिवलीतील नागरिकांना शालेय बसच्या माध्यमातून आता तरी आत्मचिंतन करा, असे सुचविण्याचा प्रयत्न केला आहे.

डोंबिवलीचे विकासाच्या बाबतीत पुढील भविष्य काय असेल, असा प्रश्न बसवरील फलकावर एक गॉगलधारी नंदीबैलाला (भोलेनाथ) करण्यात आला आहे. शहराच्या अनेक भागांत पावसामुळे खड्डे पडले आहेत. ते खड्डे कधी बुजवले जातील, हे प्रशासन यंत्रणांकडून आम्हाला सांगितले जात नाही; पण करदात्या नागरिकांना हे खड्डे कधी भरले जातील, हे भोलनाथ तुम्हीच सांगा, असा प्रश्न बॅनरवर केला आहे.

कचराकुंड्या साफ होऊन नागरिकांचे आरोग्य सुधारेल का, फेरीवाले कायमचे हटून पदपथ नागरिकांना चालायला मिळतील का, रस्ते वाहतुकीला मोकळे होतील का, लोकल गर्दीमुळे होणारे अपघात कमी होण्याची शक्यता आहे की नाही, महापालिकेची डोंबिवलीतील रेल्वेस्थानकालगतची धोकादायक इमारत तोडून तेथे अद्ययावत प्रशासकीय, नागरी सुविधांचे संकुल उभे राहील का, असे प्रश्न विचारण्यात आले.