गावठी कट्टा बाळगणाऱ्याकडे पोलिसांचे गणवेश
कल्याण, ता. ६ (बातमीदार) : विनापरवाना गावठी कट्टा आणि पोलिस गणवेश बाळगणाऱ्या एका युवकाला खडकपाडा पोलिसांनी अटक केली आहे. अटक केलेल्या या आराेपीचे नाव सनीकुमार विजय पाल ऊर्फ चौहाण (१९) असे आहे. तो कल्याणच्या मिलिंदनगर परिसरात राहत होता, अशी माहिती आहे.

गौरीपाडा मिलिंदनगर परिसरात एक व्यक्ती पिस्तूल घेऊन येणार आहे, अशी माहिती पोलिसांना मिळाली होती. त्यानुसार खडकपाडा पोलिस ठाण्याचे गुन्हे प्रकटीकरण शाखेचे सहाय्यक पोलिस निरीक्षक विजय गायकवाड यांनी परिसरात सापळा रचला. त्याठिकाणी एक तरुण संशयास्पदरीत्या फिरताना आढळून आला असता त्याला पोलिसांनी ताब्यात घेतले. त्याची चौकशी केली असता त्याच्याकडे एक गावठी कट्टा मिळून आला.

पोलिसांनी अधिक तपासाच्या दृष्टीने या व्यक्तीच्या घराची झडती घेतली असता त्याच्या घरी पोलिसांचेच दोन जोडी खाकी गणवेश आढळून आले. ज्यातील गणवेशासोबत एक स्टारही होता. यानंतर पोलिसांनी त्याला तत्काळ अटक केली. इन्स्टाग्रामवर त्याने पोलिसाचा गणवेश घालून हाती गावठी कट्टा घेत एक फोटोही पोस्ट केला आहे. या प्रकरणाचा पुढील तपास वरिष्ठ पोलिस निरीक्षक अमरनाथ वाघमोडे यांच्या मार्गदर्शनाखाली सहाय्यक पोलिस निरीक्षक विजय गायकवाड करीत आहेत.