भिवंडी, ता. ६ (बातमीदार) : लोकसभा मतदारसंघाच्या विकासावरून माजी केंद्रीय मंत्री कपिल पाटील आणि खासदार सुरेश म्हात्रे यांच्यात आरोप-प्रत्यारोप सुरू आहेत. अशातच भिवंडीकरांचा वर्षभरात भ्रमनिरास झाला असून, जनतेची दिशाभूल झाल्याची टीका कपिल पाटील यांनी केली आहे.
राष्ट्रवादी काँग्रेसचे खासदार सुरेश म्हात्रे यांनी पत्रकार परिषदतेतून कपिल पाटील यांनी १० वर्षांत काहीही काम केले नसल्याचा आरोप केला होता. त्यावर माजी केंद्रीय राज्यमंत्री कपिल पाटील यांनीदेखील पलटवार करताना केलेल्या आरोपांचे खंडन करीत पुरावे सादर केले. या वेळी टोरंट पॉवर, वऱ्हाळदेवी तलाव, कल्याण-मुरबाड रेल्वे अशा विविध प्रश्नांवर कपिल पाटील यांनी सविस्तरपणे माहिती दिली. निवडणुकीच्या वेळी टोरंट कंपनी हटविण्याची घोषणा खासदारांनी केली होती. त्याबाबत कपिल पाटील यांनी माहिती देताना टोरंट पॉवरचा करार हा २०२७ पर्यंत होता. तोपर्यंत टोरंटला हटविता येणार नसल्याचे राष्ट्रवादी काँग्रेसचे अध्यक्ष शरद पवार यांनी २०१३मध्ये भिवंडीच्या शिष्टमंडळाकडे स्पष्ट केले होते. काँग्रेस-राष्ट्रवादी काँग्रेसच्याच काळात टोरंट आले होते. खासदारकीची निवडणूक लढविणाऱ्या उमेदवाराला या कराराबाबत काही माहिती नव्हते का, असा सवाल त्यांनी उपस्थित केला. याचबरोबर भिवंडीतील आयजीएम हॉस्पिटलला जिल्हा रुग्णालयाचा दर्जा देण्याचा मुद्दा हा तांत्रिक आहे. या रुग्णालयाची क्षमता २०० बेडची असून, नियोजित माता-बाल रुग्णालयही २०० बेडचे आहे. त्यामुळे या हॉस्पिटलला जिल्हा रुग्णालयाचा दर्जा सहज मिळू शकेल; परंतु टोरंट, आयजीएमसारखे राज्य सरकारशी संबंधित विषय संसदेत मांडून स्वत:ची पाठ थोपटली जाते, अशी टीका केली.
---------------------------------
विकासकामांचा वाचला पाढा
भिवंडी लोकसभा मतदारसंघात १० वर्षांत खासदार म्हणून काम करताना झटत होतो. त्यातून ठाणे-भिवंडी-कल्याण मेट्रो, आठ पदरी ठाणे-भिवंडी बायपास, कल्याण-मुरबाड रेल्वे अशी असंख्य छोटी-मोठी कामे मंजूर करून घेतली होती. मात्र गेल्या वर्षभरात कोणतीही कामे पत्र देऊन होत नाहीत, असा टोला त्यांनी लगावला. ठाणे-भिवंडी मेट्रो, मुरबाड रेल्वे प्रकल्प मंजूर केला. वडपे ते नाशिक या सहापदरी महामार्गाची मागणी केली होती. या कामालाही नाशिकच्या बाजूने सुरुवात झाली असल्याचे कपिल पाटील यांनी सांगितले.