विठूच्या भक्‍तिरसात रंगले भाविक
मंदिरात पहाटेपासून रांगा; दिवसभर भजन, कीर्तनाचे सूर

नवी मुंबई, ता. ६ ः विठूनामाचा जयघोष आणि टाळ-मृदंगाच्या गजरात रविवारी शहरातील मंदिर परिसर दुमदुमला होता. आषाढीनिमित्त मंदिरांमध्ये आकर्षक रोषणाई व फुलांची सजावट करण्यात आली होती. दिवसभर हरिपाठ, भजन, कीर्तन, अभंग गायनाचे कार्यक्रमांचे आयोजन केले होते. पहाटे महापूजेनंतर मंदिर दर्शनासाठी खुले करण्यात आले.
‘ज्ञानेश्‍वर माउली’, ‘पुंडलिक वरदा हरी विठ्ठल, पंढरीनाथ महाराज की जय’, ‘जय जय राम कृष्ण हरी’च्या जयघोष करीत पहाटेपासूनच भाविकांनी दर्शनासाठी रांगा लावल्‍या होत्‍या, तर अनेक ठिकाणी दिंडी सोहळ्याचे आयोजन केले होते. मंदिर प्रशासनाने दर्शनासाठी विशेष व्यवस्था केली असून सुरक्षा, स्वच्छता आणि पिण्याच्या पाण्याची योग्य सुविधा उपलब्ध करून दिली होती.
घणसोली येथील विठ्ठल मंदिरात पहाटे अभिषेक, पूजा करण्यात आली. त्‍यानंतर भाविकांनी दर्शन घेतले. या वेळी प्रसाद म्हणून खिचडीचे वाटप केले. ऐरोली दिवागाव मंदिरात आषाढी एकादशीचा उत्सव साजरा करण्यात आला. ऐरोलीत संत सावतामाळी भवनात भाविकांनी रांगा लावल्या होत्या. या वेळी खिचडी, राजगिरा लाडू, केळ्यांचे वाटप करण्यात आले, तर संध्याकाळी दिंडी काढण्यात आली. रात्री भजनाचे आयोजन केले होते.