पशुवैद्यकीय रुग्णालयाचा तिढा सुटणार
यंदाच्या निविदा प्रक्रियेला सात ठेकेदारांकडून प्रतिसाद
वाशी, ता. ७ (बातमीदार) ः नवी मुंबई महापालिकेच्या वतीने जुईनगर सेक्टर-२४ येथे पशुवैद्यकीय रुग्णालय उभे राहिले आहे, मात्र मागील तीन वर्षांपासून विविध कारणांनी या रुग्णालयाची रखडपट्टी सुरू आहे. पालिकेने रुग्णालय सुरू करण्यासाठी तीन वेळा निविदा काढली होती, तर त्या निविदेलादेखील प्रतिसाद देण्यात मिळाला नव्‍हता. अखेर पालिकेकडून निविदेमधील अटी-शर्तीमध्ये बदल केला होता. त्‍यानंतर पुन्हा निविदा काढण्यात आली होती. या निविदेमध्ये आता सात ठेकेदार कंपन्यांनी प्रतिसाद दिला आहे. त्यामुळे लवकरच पशुवैद्यकीय रुग्णालय सुरू होण्याच्या आशा पल्लवित झाल्या आहेत.
नवी मुंबई महापालिकेचे तत्कालीन महापौर जयवंत सुतार यांच्या हस्ते जुईनगर येथील पशुवैद्यकीय रुग्णालयाच्या इमारतीचे भूमिपूजन करण्यात आले होते. निवासायोग्य शहरामध्ये द्वितीय क्रमांकाचे शहर म्हणून देशात गाजलेल्या तसेच स्वच्छ भारतमध्ये राज्यात सातत्याने प्रथम क्रमांक मिळवलेल्या नवी मुंबई शहरात नागरिकांप्रमाणेच पशु-पक्ष्यांच्या आरोग्याच्या दृष्टीने नवी मुंबई महापालिका सकारात्मक असल्याचे या माध्यमातून अधोरेखित केले गेले होते. तसेच अशा प्रकारचे पशुवैद्यकीय रुग्णालय असणारी नवी मुंबई ही राज्यातील अग्रणी महापालिका असेल, असे भाकीत त्या वेळी केले गेले, परंतु तीन वर्षे उलटल्यानंतरही या इमारतीचे लोकार्पण करण्यात पालिका प्रशासनाला अपयश आले आहे. पशुवैद्यकीय अधिकारी डॉ. श्रीकांत तोडकर यांनी रुग्णालय सुरू करण्यासाठी कंबर कसली होती. हे रुग्णालय भाडेतत्त्वावर चालविण्यासाठी पालिकेने पुढाकार घेतला होता. तीन वेळा त्यासाठी निविदादेखील काढण्यात आली होती, मात्र त्याला प्रतिसाद मिळाला नसल्यामुळे रुग्णालय रखडले आहे. अखेर यामधील अटी-शर्ती कमी करण्यात येऊन मनुष्यबळ पुरवून पालिकेने रुग्णालय सुरू करण्याचा चंग बांधला आहे. नव्याने काढलेल्या निविदेला सात कंत्राट कंपन्यांनी प्रतिसाद दिला आहे. त्यामुळे आता रुग्णालय लवकरच सुरू होण्याची शक्यता व्यक्त केली जात आहे.
.........................
पशुवैद्यकीय रुग्णालय सुरू करण्यासाठी पालिकेने कसोशीने प्रयत्न केले आहे. पालिकेने काढलेल्या या निविदेसाठी सात एजन्सीने प्रतिसाद दिला आहे. या एजन्सीची पडताळणी करण्यात येईल. त्यामध्ये पात्र एजन्सीच्या माध्यमातून रुग्णालय सुरू करण्यात येईल.
-डॉ. श्रीकांत तोडकर, पशुवैद्यकीय आधिकारी, नवी मुंबई महापालिका